’’یہ ناول ابھی اردو میں پڑھنا شروع کروں گا۔ لیکن وہ کہتے ہیں کھانا کتنا ہی برا کیوں نہ پکا ہوا لیکن اگر presentation اچھی ہو تو بندہ مزے سے کھا لیتا ہے۔ اچھے لباس کے اندر بندے کا پتہ بعد میں چلتا ہے لیکن پہلی نظر میں وہ دیکھنے والوں پر تاثر چھوڑ جاتا ہے۔ یہی حال اس ناول کا ہے کہ ایسا خوبصوتی سے چھاپا گیا ہے کہ بے اختیار پڑھنے کو دل کرے۔ بلاشبہ یہ ادب کی دنیا کا بڑا ناول ہے۔ ایک بڑے ادیب کی کاوش ہے اور مخممور جالندھری نے ترجمہ کیا ہے۔ نعیم بھائی کہتے تھے ایک شاعر سے بہتر ترجمہ کوئی نئیں کرسکتا کیونکہ اس کے پاس لفظوں کا ایک ایسا خزانہ ہوتا ہے جو نثرنگار کے بس کی بات نہیں ہے۔ پھر شاعر جانتا ہے کہ لفظ ضائع نہیں کرنے اور کم لفظوں میں پورا جہاں سمو دینا ہے۔ ابھی پڑھنا شروع کیا ہے تو یقین کریں نعیم بھائی کی بات یاد آئی اور ترجمے کا لطف کیا ہوتا ہے اسے محسوس کیا اور مخمور جالندھری کو دعائیں دیں جن کا اصلی نام
سردار گور بخش سنگھ تھا....جالندھر میں پیدا ہوئے تھے۔ ان کا ایک شعر ملاحظہ فرمائیں

مخمورؔ کچھ نہ پوچھیے مجبورئ حیات
اچھی طرح خراب فنا بھی نہ ہو سکے

ایک بڑا ناول، ایک بڑا ادیب اور ایک خوبصورت شاعر اور ادیب کا کیا گیا ترجمہ ... گرم کافی کا مگ، باہر چار سُو خاموشی ، میخائل شولوخوف کا ساتھ ... اس سے زیادہ خوبصورت صبح کیا ہوسکتی ہے۔‘‘
(رؤف کلاسرا Rauf Klasra)

نوبیل انعام برائے ادب 1965ء
میخائیل شولوخوف کا ناول And Quiet Flows the Don کا اُردو ترجمہ

اشاعت اوّل: 1928ء (روسی زبان)
اشاعتِ نو جولائی 2020ء (اُردو زبان)
کتاب: اور ڈان بہتا رہا | ناول: میخائیل شولوخوف
مترجم: مخمور جالندھری | نظرثانی: شہزاد نیّر
ضخامت 504 صفحات | قیمت 999 روپے
.
مختصر تعارف:
عظیم رُوسی مصنف میخائیل شولوخوف کا نوبیل انعام یافتہ ناول ’’اور ڈان بہتا رہا‘‘ پوری دُنیا میں معروف و مقبول ہے۔ اس ناول میں بیسویں صدی کے ابتدائی دو عشروں کے رُوس کی ثقافت و معاشرت اور اجتماعی و انفرادی نفسیات کا بےمثال فن کارانہ بیان ہے۔ ناول کی کہانی دریائے ڈان کے کنارے آباد رُوسی کاسکوں کے گِرد گھومتی ہے۔ دل کش منظر کشی، جزئیات نگاری، کردار نگاری اور دل نشیں اسلوبِ نگارش کے باعث یہ ناول قاری کی یادداشت کا حصہ بن جاتا ہے۔ یہاں سماجی حقیقت نگاری (Social Realism) کا جادو سر چڑھ کر بولتا ہے۔ کسی نے کہا ہے کہ حقیقت افسانے سے بڑھ کر تحیر خیز ہوتی ہے۔ یہی وجہ سے کہ ہم جوں جوں ناول پڑھتے جاتے ہیں اس کے کردار ہمارے ارد گرد چلنے پھرنے لگتے ہیں۔ یہی ایک غیر معمولی ادبی شہ پارے کی نشانی ہوتی ہے۔ پہلی عالمی جنگ (1914-1918ء) اور بالشویک انقلاب (1917ء) کے تفصیلی ادبی بیان نے اس ناول کو بےحد اہم بنا دیا ہے۔ مصنف نے انقلاب کے حالات اور کرداروں کی جس طرح لفظی تصویر کشی کی ہے وہ کسی فنی معجزے سے کم نہیں ہے۔ انقلابِ رُوس کے تعلق سے بےپناہ ادب تخلیق ہوا لیکن زیرِنظر ناول جیسی فن کارانہ دیانت، غیر جانب داری، بےباکی اور انسان دوستی شاید ہی کسی اور ناول میں نظر آئے۔ یہاں انسان نظریے سے اہم تر دکھائی دیتا ہے۔ امن، جنگ، انقلاب اور خانہ جنگی کا احوال بیان کرتے ہوئے ناول نگار کی چابک دستی اور بیان پر گرفت داد سے بالا ہے۔ مخمور جالندھری نے جس محنت، مہارت اور ہمہ گیری سے ناول کا اردو ترجمہ کیا اس کی داد نہ دینا ناانصافی ہوگی۔ اس اعلیٰ درجے کے ناول کا ترجمہ بھی اتنا ہی اعلیٰ درجے کا ہوا ہے۔ مترجم کی اُردو زبان پر تخلیقی گرفت اور مناسب ترین الفاظ کا چناؤ قابلِ تحسین ہی نہیں قابلِ تقلید بھی ہے۔ ’’اور ڈان بہتا رہا‘‘ نہ صرف رُوسی بلکہ عالمی ادب میں بھی ایک شہ کار ہے۔ بڑا ادب پڑھنے کے شوقین افراد کے لیے یہ ناول ایک سوغات سے کم نہیں۔

AUR DON BEHTA RAHA

اور ڈان بہتا رہا | Mikhail Sholokhov | And Quiet Flows the Don