غالب کی آپ بیتی | مرتبہ: نثاراحمدفاروقی
مرزا غالب کے خطوط سے اُنہیں کے لفظوں میں ترتیب دی ہوئی
مکمل خودنوشت سوانح حیات جس کا ہر لفظ مستند ہے
اعلی کوالٹی پیپر| رنگین تصاویر

شاید ہندوستان میں کسی اور زبان کے شاعر کو یہ امتیاز حاصل نہیں ہے کہ وہ ماضی، حال اور مستقبل پر یکساں گرفت رکھتا ہو۔ غالبؔ اپنے عہد میں بھی سربرآوردہ تھا اور آج بھی سب سے زیادہ قدآور ہے اور کل بھی اس کے خیال کی رفعتوں کے سامنے پست و زبوں ہی نظر آتا ہے۔ یقین ہے کہ آنے والی نسلیں غالبؔ کو انبساط و انقباض، کرب و نشاط اور رنج و راحت کے ہر موڑ پر اپنا ہم نوا اور شریک پائیں گی۔ اُس کی عظمت کا سب سے بڑا مظہر یہ ہے کہ وہ ’’معمولی‘‘ انسان ہے۔ ہماری طرح کبھی ہنستا ہے کبھی روتا ہے، کبھی گنگناتا ہے، کبھی کڑھتا ہے۔ جب تک بنی نوعِ انسان پر یہ کیفیات گزرتی رہیں گی غالبؔ کو بُھلایا نہیں جا سکتا۔ شاعری کی طرح اس کے خطوط بھی ایک معمولی انسان کی غیر معمولی سرگزشت ہیں۔ آج سے ایک صدی پہلے کے سماج میں ایک نابغہ (Genius) کس طرح بسر کرتا تھا۔ اس کے مشاغل، مصروفیات، آرزوئیں، ولولے، حوصلے، ناکامیاں، جھوٹی تسلیاں، مصائب اور مکارہ، کس طرح اُسے چاروں طرف سے اپنے نرغے میں لیے ہوئے تھے، وہ کیسا شاعر تھا، کیسا مفکر تھا، یہی نہیں ایک اُستاد، ایک شوہر، ایک ہمسایہ، ایک درباری اور ایک دوست کی حیثیت سے وہ کیا تھا، کتنا بلند، کیسا خوشامدی اور خوددار تھا۔ یہ سب رنگا رنگ جلوے اُس کے خطوں میں ملیں گے، جن کا ہر فقرہ جہانِ معنی ہو گا، ہر لفظ عالمِ کیفیات لیے ہو گا۔ غالبؔ نے 72سال کی زندگی پائی اور یہ زندگی بڑی ہموار گزری۔ اس میں کسی بلند نصب العین کے لیے کوئی جدوجہد یا ہمہمہ و ہنگامہ نہیں ہے۔ یہ ’’آپ بیتی‘‘ مختصر ہے اور تشنہ بھی___ لیکن تشنگی اس لیے محسوس ہوتی ہے کہ غالبؔ کے بارے میں آپ زیادہ سے زیادہ جاننا چاہتے ہیں۔ خصوصاً جب وہ خود ہی ہم کلام ہو تو آپ کی گرویدگی کا یہ عالم ہو جاتا ہے کہ

آواز پہ مرتا ہوں میں ہر چند سر اُڑ جائے
جلّاد سے لیکن وہ کہے جائیں کہ ’’ہاں اور‘‘

نثاراحمدفاروقی

Ghalib Ki Aap Beeti