’’اقبال، بچوں اور نوجوانوں کے لیے‘‘ اس کتاب میں مصنف نے علّامہ اقبال اور اُن کی شخصیت سے متعلق، وہ تمام واقعات جمع کر دیے ہیں جو بچوں سے متعلق ہیں یا جنہیں بچّے اور نوجوان دلچسپی سے پڑھیں گے۔ مزید برآں بچوں اور نوجوانوں کے بارے میں اقبال کے جذبات و احساسات اور ان سے مستقبل کی امیدوں کا ذکر بھی کیا گیا ہے۔ مختلف روایات کی مدد سے عنایت صاحب نے بتایا ہے کہ بچوں سے اقبال کا رویّہ ہمیشہ محبّت، شفقت اور سرپرستی کا ہوتا تھا۔ اس طرح ملازمین اور اہلِ خانہ سے بھی ان کا سلوک قابلِ قدر تھا۔ کتاب پڑھتے ہوئے قاری کو پتا چلتا ہے کہ اگرچہ علّامہ اقبال بہت بڑے فلسفی اور شاعر تھے مگر طبعاً نہایت سادگی پسند تھے۔ لباس بہت سادہ پہنتے، ان کے ہاں کسی طرح کی بناوٹ، نمود و نمائش یا ٹھاٹھ باٹھ نہ ہوتا تھا۔ ہر خاص و عام، جب وہ چاہے، ان سے مل سکتا تھا۔ طبیعت میں انکسار بہت تھا۔ عنایت علی صاحب نے بچوں کواقبال کے دوستوں اور احباب سے متعارف کرایا ہے۔ تعارف کے ساتھ ان کی تصاویر بھی دی ہیں۔ آخر میں بچوں کی دلچسپی کی ایک اور چیز ہے۔ پاکستان اور دوسرے ممالک کے محکمہ ڈاک نے علّامہ اقبال کی یاد میں جس قدر ڈاک ٹکٹ جاری کیے ہیں، ان سب کی تصاویر اور ٹکٹوں کے کوائف بھی شاملِ کتاب ہیں۔ امیدِ واثق ہے کہ عنایت علی صاحب کی یہ کتاب مقبولِ عوام و خواص ہو گی۔

(پروفیسر ڈاکٹر رفیع الدین ہاشمی)

اقبال بچوں اور نوجوانوں کے لیے | مصنف: عنایت علی
علّامہ اقبال کی مجلسی اور نجی زندگی سے کچھ منتخب واقعات
نایاب تصاویر اورمحکمہ ڈاک کی یادگار ٹکٹوں سے مزین

Iqbal - Bachon aur Naujawanon ke liye