یہ ہر دن تھوڑا تھوڑا کرکے مرنے کا تکلف کیا
یہ کام اک روز بہتر ہے کہ سارا کرلیا جائے
۔۔۔۔۔۔
جاگیے، دیوار جاں کو چاٹیے، سو جائیے
عمر کی یکسانیت سے زندگی اکتاگئی
۔۔۔۔۔۔
قریۂ ہجر میں ملتے ہوئے لوگو، سوچو
جانے کب، کون، کہاں، کس سے جدا ہوجائے
۔۔۔۔۔۔۔
ہمارے اپنے حصے کا ابھی جو وقت باقی ہے، خدائی میں وہ کتنا ہے خدا جانے!
لبالب روغن جاں سے چراغوں نےابھی طاق ہوا پر اور کتنی دیر جلنا ہے، ہوا جانے!
۔۔۔۔۔۔۔۔
گنتی
یہ آٹھ پہروں شمار کرنا
کہ سات رنگوں کے اس نگر میں
جہات چھ ہیں
حواس، خمسہ، چہار، موسم
زماں، ثلاثہ، جہان دو ہیں
خدائے واحد!
یہ تیرے بے انت وسعتوں کے
سفر پر نکلے ہوئے مسافر
عجیب گنتی میں کھوگئے ہیں۔
۔۔۔۔۔۔۔۔۔
دیکھوں تو ہے نگاہ میں دنیا کے ہفت رنگ
سوچوں تو کوئی سامنے تیرے سوا نہیں
۔۔۔۔۔۔
واعظ! تری حکائت قہر خدا، بجا
لیکن خداگواہ کہ دل مانتا نہیں
۔۔۔۔۔۔
اٹھا کر حبس لے جائے جو سارا میرے سینے سے
کوئی جھونکا محمد مصطفیٰؐ تیرے مدینے سے
۔۔۔۔۔۔۔۔
شہر غزل کو شہر خموشاں نہ جانیے
آواز اس میں گھومتی پھرتی ہے میر کی
۔۔۔۔۔۔۔۔
یقینا ایک دن ہم کو گماں خود اپنے ہونے کا
جسے اب تک نہیں دیکھا اسی کو دیکھ کر ہوگا
۔۔۔۔۔۔۔۔
تمہارے ساتھ دیکھی تھی وگرنہ زندگی ہم کو
نہ تب محسوس ہوتی تھی نہ اب محسوس ہوتی ہے
۔۔۔۔۔۔۔۔
تمہیں مار ڈالا ہے جن کے طرز حیات نے
انھیں جاکے شہر قبور میں بھی تو دیکھیے،
۔۔۔۔۔۔۔
دم دید واسطہ آنکھ کا نہیں چاہیے
ترے ربط میں ہمیں رابطہ نہیں چاہیے
۔۔۔۔۔۔۔۔
نظروں کا یہ دھوکا بھی غنیمت ہے وگرنہ
افلاک کے اس پار بھی ایسا ہی خلا ہے
۔۔۔۔۔۔۔۔
قیامت میں ذرا سا تخلیہ بھی ۔۔۔!
کہ تم سے بھی ہمیں کچھ پوچھنا ہے
۔۔۔۔۔۔۔۔
اپنی اذاں تو کوئی مؤذن نہ سن سکا
کانوں پہ ہاتھ رکھے ہوئے بولتا رھا
۔۔۔۔۔۔۔۔
بڑی لذتیں ہیں گناہ میں جو نہ کیجئے
جو نہ پیجئے تو عجب نشہ ہے شراب میں
۔۔۔۔۔۔۔۔۔
ہمیں تری عنایتوں سے ہیں بڑی شکائتیں
ہمیں ہمارا رزق بھی اچھال کر دیا گیا ۔ !
۔۔۔۔۔۔۔
آسماں تک جائے گی خوشبو مرے افکار کی
جب تعفّن جسم کا زیرِ زمیں ہو جائے گا
۔۔۔۔۔۔۔۔۔
ہمارے خالی ہاتھ میں تھما کے کاسۂ طلب
جواب کیا دیا گیا ،سوال کر دیا گیا
ترا کرم ہے زندگی تو پھر وہ لوگ کون ہیں
کہ جن پہ یہ کرم ترا وبال کر دیا گیا
۔۔۔۔۔۔
خدا کو آدمی سمجھا ھے تو نے
جو ایسے گڑگڑا کر مانگتا ھے ؟
۔۔۔۔۔۔۔
بتا ان اہل ایماں کی سزا رکھی ہے کیا تو نے
خداوندا جو تجھ کو احتیاطا ً مان لیتے ہیں
۔۔۔۔۔۔
؎ کتنے پہرے سوچ پر ہیں دوستو
اور پھر بھی سوچتا کوئی نہیں
تیرگی حدّ نظر تک تیرگی
اور پھر بھی دیکھتا کوئی نہیں
۔۔۔۔۔۔۔
اتنی ذرا سی بات کو اتنا نہ طول دے
اس داستانِ عمر کا اب اختتام کر
۔۔۔۔۔۔۔
فلک پہ کوئ دراڑ ہو گی مری مسافت کی انتہا پر
زمیں میں کوئ شگاف ہوگا کہ جس کو میرا بدن بھرے گا
۔۔۔۔۔۔
یہ کیسی ہوسناک قناعت ہے خدایا !
جو تارکِ دنیا ہے وہ فردوس طلب ہے
۔۔۔۔۔۔۔
جیسے کسی کو خواب میں میں ڈھونڈھتا رہا
دلدل میں دھنس گیا تھا مگر بھاگتا رھا
۔۔۔۔۔۔۔
آدم کی کسی روپ میں تحقیر نہ کرنا
پِھرتا ہے زمانے میں خُدا بھیس بدل کے
۔۔۔۔۔۔۔۔۔۔

کلیات سید مبارک شاہ

Kuliyat Syed Mubarak Ali Shah