ایک بے بس عورت کی کہانی… امرتا پریتم کی زبانی … عورت جو انتقام کا شکار ہوئی، جو اپنے بطن کے بیٹے کو بھی ماں کا پیار نہ دے سکی، جو تاعمر اپنے گھر، اپنے کنبے اور اپنے منگیتر کو نہ بھُلا سکی۔ جس نے تقسیم کی خوں ریزی میں خود کو خطرے میں ڈالا اور دوسری عورتوں کی عصمت و عفت کی حفاظت کی لیکن خود … موقع ملنے پر بھی اپنے بیٹے کی خاطر واپس نہ جا سکی … اپنے کنبہ میں، اپنے عزت کے گہوارے میں۔

پنجر | ناول | گورمکھی سے اُردو زبان میں
مصنف: امرتا پریتم Amrita Pritam
لوح: پروفیسر قدیر احمد کھوکھر
سرورق مصور : جمی انجینئر Jimmy Engineer
دنیا کے بہترین کاغذ پر نفیس اشاعت

حرفے چند:

اس حقیقت سے انکار مشکل ہے کہ امرتا پریتم کا یہ مختصر سا ناول ان کی ایک غیر معروف تحریر تھی جس سے بہت کم لوگ واقف تھے لیکن 2003ء میں چندر پرکاش دِویدی نے اسے سکرین پلے کی شکل دی اور اس کی فلم تیار ہوکر باہر آئی تو ہرطرف اس کہانی کی دھوم مچ گئی۔ پارو / حمیدہ کا کردار انتہائی مہارت سے بالی ووڈ کی معروف اداکارہ ارمیلا مٹونڈکر نے ادا کیا اور اس کے منگیتر رام چند کے کردار میں سنجے سوری نے اپنے فن کا کمال دکھایا جبکہ رشید کا مشکل اور پیچیدہ کردار ایک ایسا چیلنج تھا جسے منوج واجپائی کے علاوہ شاید کوئی قبول نہیں کر سکتا تھا۔ اس ناول کو پڑھنے کے بعد یہ فلم دیکھنا نہ بھولیے گا جو ’’پنجر‘‘ کے نام سے ہی فلمائی گئی۔ بلاشبہ، جب تک اس دھرتی پر انسان دوست کردار زندہ رہیں گے ’’پارو‘‘ کا نام زندہ رہے گا اور اس پارو کی صورت میں ’’امرتا‘‘ واقعی ’’امرتا‘‘ ہو گئی ہے۔ ناول کا اختتام بھی اتنا ہی جان دار ہے۔ جس میں پارو اپنے بھائی کے اصرار کے باوجود اس کے ساتھ نہیں جاتی اور رام چند اپنے سابق منگیتر کے ہونٹوں پر جمے دکھ کو بھی برداشت کر جاتی ہے اور کہتی ہے:

’’چاہے کوئی ہندو لڑکی ہو، چاہے مسلمان جو بھی لڑکی ٹھکانے پر واپس پہنچ رہی ہے، سمجھو کہ اسی کے ساتھ پارو کی روح بھی ٹھکانے پر پہنچ رہی ہے۔‘‘ پارو نے اپنے دل ہی دل میں کہا اور دونوں آنکھیں جھکاکر رام چند کو آخری پر نام کیا۔ لاری چل پڑی تھی اور خالی سڑک پر گرد اڑنے لگی تھی۔‘‘

پروفیسر قدیر احمد کھوکھر
قلعہ دیدار سنگھ، گوجرانوالہ

Pinjar | پینجر | امرتا پریتم