’’قبض زماں‘‘ میں نے سنہ 2011 میں لکھی تھی۔ میں اسی زمانے میں ’’کئی چاند تھے سرِ آسماں‘‘ کا انگریزی ترجمہ بھی کر رہا تھا۔ گویا حسرت موہانی مرحوم کے الفاظ میں ’’مشق سخن‘‘ بھی جاری تھی اور ’’چکی کی مشقت بھی‘‘۔ اگر ’’کئی چاند…‘‘ کے انگریزی ترجمے کو ’’چکی کی مشقت‘‘ قرار دیں تو ’’قبض زماں‘‘ کی تحریر کو ’’مشق سخن‘‘ کہنے میں کوئی مضائقہ نہیں۔ لیکن وہ دن بھی کیا تھے کہ دونوں کام ایک ساتھ رواں تھے اور مجھے کسی تعب کا احساس نہ تھا۔ چار ہی پانچ برس میں صورتِ حال اتنی بدل گئی ہے کہ یہ چند سطور بھی مجھ پر بھاری پڑ رہی ہیں۔ خیر، بقول میرؔ ^
عشق جو چاہے تو مُردے سے بھی اپنا کام لے
’’قبض زماں‘‘ پہلے ممبئی کے مشہور پرچے ’’اثبات‘‘ میں شائع ہوا۔ پھر اس کے فوراً بعد کراچی کے مشہور پرچے ’’دُنیا زاد‘‘ میں۔ آصف فرخی نے اپنے ادارے ’’شہرزاد‘‘ کراچی سے اسے کتابی شکل میں شائع کیا۔ پھر اظہار احمد ندیم نے اپنے ادارے ’’عرشیہ پبلی کیشنز‘‘ سے اسے چھاپا۔ دونوں اشاعتوں میں کچھ خفیف ترمیمات بھی تھیں، بطورِخاص کراچی والے ایڈیشن میں کتابت کے اغلاط بہت تھے اور کیوں نہ ہوتے، جب میں ہی نے اسے اپنے کمپیوٹر پر ٹائپ کیا تھا۔ کتابیں لکھنے، بناتے، شائع کرتے ایک عمر گذر جانے کے باوجود میں یہ سبق نہ سیکھ سکا کہ اپنی لکھی ہوئی تحریر میں غلطیاں در آنا لابدی اور لازمی ہے۔ خیر، ’’عرشیہ پبلی کیشنز‘‘ کے لیے میں نے ممکن حد تک غلطیاں ٹھیک کر دیں۔ ’’عرشیہ پبلی کیشنز‘‘ کے اظہار احمد ندیم نے مجھ سے ایک دیباچہ بھی لکھوایا لیکن وہ کسی باعث شامل اشاعت نہ ہو سکا۔ اس بار وہ بھی شامل ہو رہا ہے۔ ’’اثبات‘‘ اور ’’دُنیا زاد‘‘ میں اس کی اشاعتوں کو شمار کر لیں تو اس چھوٹی موٹی کتاب کا یہ پانچواں ایڈیشن آپ کے ہاتھ میں ہے۔
دیباچے میں انتظار حسین اور نیرمسعود کے حوالے سے کچھ باتیں تھیں۔ انتظار صاحب کے مشورے (یا ان کے کہنے پر) میں نے متن سے کچھ عبارت نکال دی تھی۔ پھر کچھ مہینے ہوئے جب ان سے لاہور میں ملاقات ہوئی تو انھوں نے اپنی رائے کا اعادہ کیا کہ قصے کی اصل کس بات یا واقعے پر ہے، اسے بتانا آپ کا کام نہیں۔ وہ دن میرے لیے بہت خوشگوار تھے جو میں نے گذشتہ نومبر میں لاہور میں انتظار صاحب کے ساتھ گذارے۔ اللہ ان کے درجات بلند کرے، ان جیسا مخلص دوست، نفیس و لطیف نثرنگار، غیر معمولی افسانہ اور ناول اور ڈراما نگار، نقاد، تہذیبی اقدار کا پارکھ، اب پیدا نہ ہو گا۔ میں نے ان کی زندگی میں کہا تھا اور اب بھی کہتا ہوں کہ وہ ہمارے زمانے کے سب سے بڑے اور سب سے مکمل ادیب تھے اور کچھ تعجب نہیں کہ آئندہ کے ادیبوں پر انتظارحسین کا اثر اتنا ہی وسیع اور ہمہ گیر ہو جتنا وسیع اور ہمہ گیر اثر عسکری صاحب نے میری اور انتظار مرحوم کی نسلوں پر ڈالا۔
میں نے ’’ہمارے لیے منٹو صاحب‘‘ کے انتساب میں انتظار حسین کو شریک کیا تھا اور ’’قبض زماں‘‘ کی گذشتہ اشاعت منٹو صاحب کو خراج عقیدت کے طور پر پیش کی تھی۔ اب ’’قبض زماں‘‘ کی اس کج مج زباں اشاعت میں انتظار حسین کی یادوں کے نام انتساب کو بھی شریک کرتا ہوں، صائب کے اس مصرعے کے ساتھ کہ ^
مرگ را داغ عزیزاں بر من آساں کردہ است
اللہ بس باقی ہوس۔
-شمس الرحمٰن فاروقی
نئی دہلی

قبضِ زماں | مختصر ناول
تصحیح شدہ ایڈیشن
مصنف: شمس الرحمٰن فاروقی

قبضِ زماں | شمس الرحمٰن فاروقی