کہے فقیر - فقیر رنگ - فقیر نگری - لوح فقیر - نوائے فقیر - - ارژنگ فقیر - عرض فقیر
دل کی گہرائیوں سے نکلی روحانی گفتگو
سرفراز اے شاہ صاحب کی 7 کتابوں کا مکمل سیٹ

.

.

تصوف، صوفی اور نوائے فقیر - محمد عامر خاکوانی

راہ سلوک کے مسافروں کو دقت یہ ہوتی ہے کہ درجہ اول کے ان عاملوں کو جینوئن روحانی بزرگوں سے الگ کیسے کیا جائے؟ یہ پڑھے لکھے عامل روحانی اسلوب میں شائستہ گفتگو کرتے اور مختلف روحانی کتب یا محافل سے اخذ کردہ ایسے فقرے (ون لائنر) بولتے ہیں جومخاطب کو متاثر کر دیں۔ مقصد روحانیت کی دھاک بٹھانا ہوتا ہے۔ بڑے ٹھسے سے عجب عجب دعوے بھی کیے جاتے ہیں۔ جینوئن فقیر یا درویش ایسا نہیں کرتا۔ روحانیت ہے ہی دو دعوؤں کے درمیان کی چیز۔ جسے معلوم ہے، وہ کہتا ہے میں نہیں جانتا، جسے کچھ نہیں پتہ، وہ صاحب روحانیت ہونے کا دعویٰ کرے گا۔

سوال یہ ہے کہ کیا کیا جائے؟ جواب بہت آسان اور سادہ ہے۔ روحانیت کیوں حاصل کی جائے؟ جواب ملتا ہے تاکہ ہم نیک ہوجائیں۔ ایسی صورت میں بزرگ ایک آسان حل بتاتے ہیں کہ سیرت نبوی ﷺ کا مطالعہ کیا جائے۔ بار بار پڑھا جائے، حتیٰ کہ واقعات یاد ہوجائیں۔ پھر پیروی کی کوشش کی جائے۔ طریقہ یہ اپنایا جائے کہ زندگی کے مختلف مراحل، کیفیتوں اور کمزور، جذباتی، اداس، تلخ، پرمسرت لمحات میں یہ دیکھا جائے کہ ہمارے آقا، سرکار مدینہ ﷺ ہوتے تو آپ ﷺکا طرز عمل کیا ہوتا؟ اللہ توفیق دے تو اسی عمل کو دہرانے کی کوشش کی جائے۔ معاملات میں، لین دین میں، عبادات، اخلاقیات ہر جگہ، ہمسایوں، ساتھیوں، بیوی بچوں، رشتے داروں، مخالفت کرنے والوں، دشمنی کرنے والوں سے سلوک، دوستوں سے محبت، غرض ہر معاملے میں سیرت کا رول ماڈل موجود ہے، اسے اپنایا جائے۔ روحانیت کا جوہر یا نچوڑ یہی ہے۔ پورا تصوف اسی نکتے پر کھڑا ہے۔ صوفی یا فقیر لوگ سالک، مرید، شاگردوں کی اسی نہج پر تربیت کرتے ہیں، اس کا تزکیہ نفس کرتے، باطنی صفائی اور ایثار وقربانی کی عادت ڈالتے ہیں۔ غیبت، چغلی، جھوٹ، عہدشکنی، ریا کاری، بداخلاقی، بدزبانی، خود غرضی اور اس جیسی بہت سی خامیاں دور کی جاتی ہیں۔

البتہ روحانیت کی مختلف اصطلاحات کو سمجھنا ہو، علم لدّنی کی مختلف شاخوں کا علم حاصل کرنا ہو تو صوفیا کی کتابیں پڑھی جائیں۔ حضرت سید علی ہجویریؒ کی کشف المحجوب جن میں سرفہرست ہے۔ دیگر صوفیا کی کتابیں پڑھی جائیں اور علم میں اضافہ کیا جائے۔ ایک مشکل ہے کہ اکثر کتابیں مشکل، دقیق اسلوب میں لکھی گئی ہیں۔ شیخ محی الدین ابن عربی کی کتابیں پڑھنا اور سمجھنا تو اچھے خاصے عالم کے بس کی بات نہیں۔

ہماری خوش نصیبی ہے کہ اس عہد کے ایک بڑے صوفی جناب سرفراز اے شاہ نے تصوف پر نہایت آسان زبان اور اسلوب میں شاندار کتابوں کی ایک پوری سیریز تحریر کی ہے۔ سرفراز شاہ صاحب وارثی، صابری، چشتی سلسلے کے بزرگ ہیں، مگر اپنی وضع قطع میں کہیں سے وہ پیر نہیں لگتے۔ مینجمنٹ کے آدمی ہیں، کلین شیو، مرتب، منظم، انگریزی بولنے والے، ایک معروف برطانوی یونیورسٹی میں پڑھاتے رہے، قدیم و جدید پر گہری نظر رکھنے والے بزرگ ہیں۔ ان کی پہلی کتاب ”کہے فقیر“ کو غیر معمولی پذیرائی ملی۔ اردو کی سب سے زیادہ شائع ہونے والی کتابوں میں سے ایک ہے۔ تیس کے قریب ایڈیشن نکل چکے۔ اس کے بعد فقیر رنگ، فقیر نگری، لوح فقیر، ارژنگ فقیر شائع ہوچکی ہے۔ ان سب کو بہت پذیرائی ملی۔ چند دن پہلے ان کی چھٹی کتاب نوائے فقیر شائع ہوئی ہے۔ جہانگیر بکس ناشر ہے۔ شاہ صاحب کی ساتویں کتاب حرف فقیر زیر طبع ہے۔ اس طالب علم کی نظر میں تصوف کی جدید تاریخ میں ان سے عمدہ کتابیں نہیں لکھی گئی ہیں۔ اس قدر آسان انداز میں تصوف کی مشکل گتھیاں شاہ صاحب نے سلجھائی ہیں کہ آدمی کو حیرت ہوتی ہے۔ معلوم ہوتا ہے کہ علم لدّنی کی رم جھم شاہ صاحب پر برس رہی ہے۔ سرفرازاے شاہ صاحب ِعرفان بزرگ ہیں۔ اس اخبارنویس کا ان سے بیس سال پر محیط تعلق ہے، بہت شفقت فرمائی۔ اس عرصے میں بیسیوں نشستیں ہوئیں۔ آج تک کبھی ان سے ایک لفظ بھی غیبت کا نہیں سنا، خود ستائی سے کوسوں دور اور اپنے بارے میں کبھی کوئی دعویٰ کیا نہ ہی اسے دنیاوی مقاصدکے لیے استعمال کرنا چاہا۔ میرے نزدیک صوفی وہ ہے جو مرید یا سالک کو اپنے گرد جمع کرنے کے بجائے ان کا رشتہ رب تعالیٰ سے جوڑ دے اور خود درمیان سے نکل جائے۔ یہ بات قبلہ شاہ صاحب میں کمال درجہ کی حد تک موجود ہے۔

Faqeer Series - Sarfaraz A Shah - Set of 7 books

Arzang e Faqeer - Sarfaraz A. Shah
Loh e Faqeer - Sarfraz A. Shah
Nawa e Faqeer - Sarfraz A. Shah
Faqeer Nagri - Sarfraz A. Shah
Faqeer Rang - Sarfraz A. Shah
Kahe Faqeer - Sarfraz A. Shah
Arz e Faqeer - Sarfaraz A. Shah