شعر اقبال

علی اکبر ناطق

.

شعرو شاعری کے اسرارو رموز کو سمجھتے ہوئے فکرِ اقبال تک پہنچنے کے لئے علی اکبر ناطق کی یہ کتاب گلستانِ اردو ادب کی تنقیدی کیاری میں ایک خوبصورت اضافہ ہے۔ اس کتاب میں ہیئتِ شعر سے متعلق بہت عمدہ بحث موجود ہے جو مشرقی اور مغربی تنقید نگاروں کی بیان کردہ تعریفوں کو سامنے لاتی ہے اور مصنف شعر کی ہر تعریف کے بعد اپنا سوال سامنے لاتے ہیں۔ اس بحث کا اختتام انکی شعر کی ہیئت سے متعلق دلچسپ وضاحت پر ہوتا ہے۔ انکا کہنا ہے کہ اچھا شعر ایک خوبصورت پوٹلی کی مانند ہوتا ہے جس میں مرصع ہیرے جواہرات اپنی رنگا رنگی پیش کر رہے ہوں۔

ناطق اس کتاب میں قاری کو اشعارِ اقبال کی جمالیاتی ساخت کے ساتھ چلاتا ہوا ان کے فکری غاروں میں چھپے ارتقائی سفر کی داستان تک لے جاتا ہے۔ ناطق نے اس وقت کی چند فلسفیانہ بحثوں کا تذکرہ کیا ہے جو اقبال کی شاعری کا موضوع بنی اور یہ بھی لکھا کہ اقبال کس طرح فلسفہ کے بنیادی سوال اٹھاتا اور شعر کے پیرائے میں شاعرانہ جمالیات کے ساتھ ان بحثوں پر روشنی ڈالتا ہے۔ مصنف نے بجا طور پر کہا ہے کہ "۔۔ اقبال کے سوالات تو ایک فلسفی کے ذہن کی پیچداری اور افتاد کے پیشِ نظر سامنے آتے ہیں لیکن جوابات ایک شاعر کے کارخانہٴ دل سے تیار ہوئے"۔

ایک دلچسپ کتاب ہے جو تنقید کی بوریت سے بچاتی ہوئی قاری کے تخلیقی سوتوں کو بھی جاری کر سکتی ہے۔ میری دانست میں یہ کتاب قاری کوشعرِ اقبال کو دیکھنے کے نئے زاویوں سے آگاہ کرنے کے لئے فی الحال تنہا یہ بوجھ اٹھائے کھڑی ہے لیکن امید ہے اقبال کے حوالے سے اس طرح کا مزید کام بھی سامنے ۔آئے گا۔ ضرور پڑھئیے

- زبیر فیصل عباسی -

.

.

Shair e Iqbal

Ali Akbar Natiq

Pages: 230

شعر اقبال | علی اکبر ناطق