آباد ہوئے برباد ہوئے

خود نوشت

علی اکبر ناطق

صفحات 398

میری خودنوشت شروع ہوتی ہے۔

ایسے شخص کی خودنوشت جس کے اجداد اصفہان و توران سے نہیں آئے۔ اگر آئے تھے تو اُس کا علم نہیں۔ محمد بن قاسم کی فوج میں تو بالکل بھی شامل نہیں تھے۔ گھوڑوں کے سوداگر بھی نہیں تھے۔ نہ سونے اور ریشمی کپڑے کا کاروبار کرتے تھے۔ ہاں دادی اماں کا ایک چچا زاد عیسیٰ خاں گڑگاؤں کے علاقے سے گھوڑے اور خچر چوری کر کے اُنھیں منڈی گروہرسا میں بیچا کرتا تھا اور منڈی کا مال لدھیانے میں۔ پنجاب کی تقسیم تک اُس کا یہی پیشہ تھا مگر اُس میں ہمیں دھیلے کا فائدہ نہیں تھا۔ یعنی اپنی نیک کمائی بگڑے لچھنوں میں صرف کرتا تھا۔ ہم کبھی نواب یا نواب کے وزیرِ اعظم بھی نہیں رہے، نہ رام پور سے وظیفہ کھاتے تھے۔ نہ کابل سے تلواریں چلاتے ہوئے نازل ہوئے۔ نہ پنج ہزاری تھے، نہ پنج صدی۔ لکھنؤ میں آموں کے باغات تھے اور نہ ہی رام پور میں نوکری کی درخواست دی۔ ستلج کے پچھواڑے میں فیروزپور کے ایک گاؤں میں رہتے تھے۔ بارشوں میں چنے اور جوار اُگاتے تھے۔ وہی کھاتے تھے۔ آبالاتی و مناتی بھی نہیں تھے۔ نہ آگا پیچھا حاجی لول بابا سے ملتا ہے۔ نہ ہم کشمیری پنڈت نہ برہمن۔

باپ دادا سرکاری ملازمت میں سیکرٹری نہیں تھا۔ چنانچہ اِس خدمت کے صلے میں اسلام آباد، لاہور یا کراچی میں کوئی پلاٹ بھی نہیں ملا۔ نہ اجداد میں کوئی ترقّی پسند تھا، نہ آزادی کی تحریک میں شامل ہوا۔ نہ دادا قائدِ اعظم کو جانتا تھا، نہ قائدِ اعظم میرے دادا سے واقف تھا۔ یہ دونوں بڑے آدمی ایک دوسرے سے اتنے ہی بیگانہ تھے جتنا ہماری اشرافیہ اپنی عوام سے۔ اجداد نے 1946ء کے الیکشن میں ووٹ بھی یونینسٹ کو دیے مگر وہ کمبخت ہار گئی۔ نہ باپ دادا علما اور صوفی تھے۔ نہ اُنھوں نے دین کی خدمت کی، نہ دُنیا کی، جس پر مجھے فخر ہوتا۔ نہ مَیں کسی علمی ادبی ادارے کا چیئرپرسن رہا۔ نہ زبان و ادب کی بےپایاں خدمت کے صلے میں حکومتی ایوارڈوں سے نوازا گیا۔ میرے گھر میں ایوارڈ کے نام سے ایک ٹھیکری بھی نہیں ملے گی۔

آپ پریشان ہوں گے، اگر یہ سب کچھ نہیں تو آخر اِس خود نوشت میں بیان کرنے کے قابل کون سی بات رہ گئی؟

احباب، یہ عام آدمی کی خودنوشت ہے، اچھے اچھوں سے اچھی رہے گی۔ کیونکہ، جگر کا ایک اِک نگیں سفر میں خرچ ہو گیا۔ آئیے شروع کرتے ہیں۔

Abad Huai Barbad Huai

Ali Akbar Natiq

Autobiography

Abad Huai Barbad Huai | Ali Akbar Natiq | آباد ہوئے برباد ہوئے | علی اکبر ناطق