اپنا گریباں چاک
جسٹس (ریٹائرڈ) ڈاکٹر جاوید اقبال

(خود نوشت سوانح حیات) اضافہ شدہ ایڈیشن

---------------------------------------------------------

پیش لفظ سے اقتباس
انسان سے بحیثیت ایک "با شعورفعل خدا"۔ یہی توقع رکھی جا سکتی ہے کہ اپنی مختصر زندگی میں "قطرے سے گہر ہونے تک" یا "قطرے سے سمندر میں فنا ہونے تک" جو بھی اس پر گزرے، بیان کر دے تا کہ اُس سرگزشت سے جو بھی سبق حاصل کرنا چاہے، کر لے۔

میں عمر میں پاکستان سے بڑا ہوں۔ میرے والد علامہ محمد اقبال، ایک عظیم شاعر، فلسفی، اور تصورِ پاکستان کے خالق سمجھے جاتے ہیں۔ اُن کے فرزند ہونے کی حیثیت سے زندگی کے مختلف ادوار میں میرا ردِّ عمل مختلف رہا ہے۔ بچپن میں باپ کے حوالے سے پہنچانا گیا تو میں نے برا نہیں مانا کیوں کہ مجھے علم ہی نہ تھا کہ وہ کون ہیں اور کیا کرتےہیں۔ جوان ہوا تو تب بھی باپ کے حوالے سے پہچانا گیا۔ یہ میرے لیے پدرم سلطان بود کی بنا فخر کا مقام تھا۔ زندگی میں اچھا برا اپنا مقام پیدا کیا، تب بھی باپ کے حوالے سے پہچانا گیا، تو مجھے بہت برا لگا۔ یہ میری "انا" کی نشونما میں مداخلت تھی۔ اب بوڑھا ہو چکا ہوں، تب بھی باپ کے حوالے سے میری شناخت ہوتی ہے۔ عجیب اتفاق ہے، میرے والد کے پرستاروں نے مجھے بڑا ہونے نہیں دیا۔ ہمیشہ چھوٹا سا بچہ ہی سمجھا گیا۔ یعنی تن آور درخت کے سائے میں ایک ننھا سا پودہ پروان چڑھتا ہے۔ وہ درازقد ہو جائے، اپنی صورت نکال لے، تب بھی پودہ ہی رہتا ہے اور بڑے درخت کے حوالے سے ہی پہچانا جاتا ہے۔

دوسری طرف ایسے لوگ موجود ہیں(بلکہ ان کی تعداد میں روز بروز اضافہ ہو رہا ہے) جو مجھے پہچانتے ہی نہیں۔ یعنی انہیں معلوم ہی نہیں کہ میں کون ہوں۔ مجھے ان پر بہت غصہ آتا ہے اور اس غصے کا ایک سبب یہ بھی ہےکہ یہ لوگ خواہ انگلش میڈیم سکول کے تعلیم یافتہ ہوں، خواہ علاقائی یا نسلی تعصب کا شکار ہوں، خواہ حالات کو بدستور قائم رکھنے والے پیشہ ور سیاستدان ہوں، خواہ سطحی تعلیم سے آراستہ فوجی افسران ہوں، سب کے سب بانیانِ پاکستان کو فراموش کر چکے ہیں۔

بہرحال میں نے کن حیلوں سے ایک بڑے درخت کے سائے سے نکل کر اپنا مقام پیدا کرنے کی کوشش کی۔ تگ و دو کے اس عالم میں کیا میں اس سائے سے نکل کر اپنا سایہ بنا سکا؟ میں کس حد تک کامیاب ہوا اور کس حد تک ناکام؟ فقط یہی میری داستان ِحیات ہے۔

جاوید اقبال
لاہور 5 اکتوبر 2002ء

اپنا گریباں چاک | Apna Gareeban Chaak