دروازے | خاکے | عرفان جاوید

.

عرفان جاوید اور ان کی کتاب دروازے کا تذکرہ پہلے پہل جاوید چودھری کے کالم میں پڑھا۔ چودھری صاحب مبالغہ آمیزی میں خاصہ ملکہ رکھتے ہیں سو میں نے بدگمانی سے کام لیا اور خیال کیا کہ کیوں کہ صاحبِ کتاب جاوید صاحب کے دوست ہیں اور کتاب میں ان کا خاکہ بھی شامل ہے اس لیے اس قدر قلابے ملائے جا رہیں۔ آج کتاب کو مکمل کرنے کے بعد میں حقتیتاً شرمندہ ہوں کہ میں نے ایسا سوچا بھی کیوں۔ عرفان جاوید کی کتاب اور اندازِ تحریر جاوید چودھری کی تعریف سے بدرجہا شاندار ہے۔
ہر خاکہ لاجواب، الفاظ کا ایسا چناؤ، تراکیب کا وہ شاندار استعمال کے بندہ ناچیز رشک کر رہا ہے اور سوچ رہا ہے کہ ایسا بھی کوئی دن آئے گا کہ چند لائینیں ایسی بھی لکھ پاؤں گا۔ ویسے تو کتاب میں شامل ہر خاکہ شاندار ہے کیوں کہ ذکر باکمال لوگوں کا ہے اور قلم عرفان جاوید کا لیکن مجھے سب سے زیادہ عبداللہ حسین، تصدق سہیل اور جاوید چودھری کے خاکوں نے متاثر کیا۔ عبداللہ حسین کی زندگی سے کئی اسباق ہیں جو سیکھے جا سکتے ہیں جن میں سب سے اہم ان کا وہ اعتراف کہ جسے وہ اپنی ایسی غلطی مانتے ہیں کہ جسے سدھارا نہیں جا سکتا، "میں اپنے اہلِ خانہ کو پوری توجہ نہیں دے پایا"۔ تصدق سہیل نے زندگی جیسے گزاری اس پر انہیں فخر ہے اور اپنی زندگی کی کہانی انہوں نے بغیر کسی حجاب کے کھلی کتاب کی طرح بیان کر دی۔ جاوید چودھری کی تحاریر کا میں ازمنہ قدیم سے شائق ہوں لیکن پچھلے کچھ عرصے میں بدگمانی سے کام لیتے ہوئے خواہ مخواہ سے ہی ان کی شخصیت سے منفی باتیں منسوب کر لی ہیں۔ جاوید چودھری نے عرفان جاوید کو بالکل صحیح گلہ کیا کہ وہ لوگ جو مجھے جانتے نہیں مجھ سے کبھی ملے نہیں کیوں خواہ مخواہ میری ذات پر رکیک حملے کرتے ہیں۔ بات سو فیصد درست ہے کہ آپ کو چودھری صاحب کی کسی بھی بات سے اختلاف ہو سکتا ہے لیکن ان سے ملے بِنا، جانے بنا ان کے بارے میں رائے قائم کرنا سراسر ناانصافی ہے۔
عرفان جاوید اور ان کی کتاب دروازے ایک ایسی کتاب ہے جو ہر اردو کتب بین کو زندگی میں کم ازکم ایک بار ضرور پڑھنی چاہیے۔ ان کا اندازِ تحریر مجھ جیسے تنہائی پسند شخص کو بھی ان سے ملنے کے لیے بے قرار کر رہا ہے۔

شاہ معین الدین

Darwaze | Khaake

Irfan Javed