بڑے پیمانے پر اپنی عظمت کی دھاک بٹھا لینے والے ادیبوں کایہ المیہ رہا ہے کہ اُن کا لکھا ہوا لفظ بہت پیچھے رہ جاتا ہے اور اُن کی شخصیت اور شخصیت کے قصے آگے نکل جاتے ہیں۔ منٹو کے ساتھ بھی یہی ہوتا رہا ہے۔ منٹو صدی کا شور اُٹھا تو سب منٹو پر بات کرنے کے لیے پُرجوش تھے اور لگ بھگ وہی باتیں دہرا رہے تھے جو اس سے قبل کہی جا چکی تھیں۔ منٹو کی اپنی زندگی اور اُس کا فن ایک دوسرے میں گھل مل کر ایک ایسا آمیزہ بن گیاتھا کہ اس شیرے کو چاٹتے چلے جانے والوں کو لطف آنے لگا ہے۔ خیر، ایساہے کہ اسی دورانیے میں منٹو کے فن کو معروضیت کے ساتھ دیکھنے کی طرف بھی رغبت نظر آئی۔ اس عہد کے سب سے بڑے نقاد اور فکشن میں بھی کمال حاصل کرنے والے شمس الرحمٰن فاروقی کی گفتگو ’’ہمارے لیے منٹو صاحب‘‘کو میں اِسی ذیل میں شمار کرتا ہوں۔ میں بہت پہلے سے منٹو کی طرف متوجہ تھا۔ منٹو اور اُس کے فن کو سمجھنے کا عمل شروع ہوا تو میں بار بار منٹو کی تحریروں کو پڑھتا تھا۔ کہیں ضرورت کے تحت ، کہیں اُسے سمجھنے کے لیے اور کبھی ایسا نہیں ہوا کہ منٹو کے افسانوں کا مطالعہ محض منٹو کو ردّ کرنے یا آنکھیں میچ کر قبول کر لینے کے جذبے کے تحت کیا ہو۔ واقعہ یہ ہے کہ میں نے تو منٹو کا مطالعہ ایک افسانہ نگار کی حیثیت سے کیا ہے ۔ جی، ایک افسانہ نگار کا مطالعہ، ایک افسانہ نگار کی حیثیت سے۔ یوں مجھے بہت سے مقامات پر منٹو فن کی بلندیوں پر نظر آیا اور ایسے بھی مقامات آئے کہ میںمنٹو سے اختلاف کر رہا تھا۔ یہی معاملہ منٹو کے ناقدین سے بھی رہاہے مگر جب جب منٹو پر ناروا حملے ہوئے اور اُس کے افسانوں کی من مانی تعبیریں ہونے لگیں تو اس باب میں مجھے قلم اٹھانا پڑا۔ ایسا بار بارہوا۔ آپ فاروقی صاحب کی کتاب ’’ہمارے لیے منٹو صاحب‘‘ کو پڑھیے کہ یہ میری نظر میں نقطۂ نظر کے اختلاف کے باوجود بہت اہم کتاب ہے۔
(محمدحمید شاہد)

کتاب: ہمارے لیے منٹو صاحب
مصنف: شمس الرحمٰن فاروقی

HAMARAY LIYAE MANTO SAHIB | SHAMSUR RAHMAN FARUQI

Pages: 125
Year: 2021

ہمارے لیے منٹو صاحب | شمس الرحمان فاروقی