حیات قائد اعظم | نیا ایڈیشن

مصنف: پروفیسر سعید راشد علیگ

-------------------------

حیاتِ قائد اعظم
پیش لفظ | پروفیسر سعیدراشد علیگ

مطلوب الحسن سید نے جو قائداعظم کے 1940ء سے 1944ء تک پرائیویٹ سیکرٹری تھے۔ قائداعظم سے ایک فوجی افسر کی ملاقات کا ایک دلچسپ اور فکرانگیز واقعہ بیان کیا ہے۔ ایک ممتاز مسلم لیگی لیڈر بمبئی میں رہتے تھے۔ اُن کے چھوٹے بھائی برطانوی فوج میں افسر تھے اور برما میں تعینات تھے۔ وہ چھٹی پر کچھ دنوں کے لئے بمبئی آئے ہوئے تھے۔ ایک رات دونوں بھائی رات کے کھانے پر قائداعظم کے ہاں آئے، بات چیت کے دوران نوجوان فوجی افسر نے قائداعظم سے کہا کہ ’’لوگ کہتے ہیں کہ پاکستان اقتصادی طور پر قابلِ عمل نہیں ہو گا۔‘‘ قائداعظم نے اُن سے پوچھا کہ ’’تم بتاؤ، اس بارے میں تمہاری کیا رائے ہے؟‘‘ نوجوان فوجی افسر نے فوراً کہا کہ ’’ہمارے نزدیک تو پاکستان یقیناً اقتصادی طور پر قابلِ عمل ہو گا۔‘‘ قائداعظم نے پوچھا: ’’کیا تم یہ محض خوش کرنے کے لئے کہہ رہے ہو۔‘‘ فوجی افسر نے کہا: ’’ہم تو فوجی افسر ہیں ہمارا کام تو صرف حکم ماننا ہے سوچنا نہیں۔‘‘ اس پر قائداعظم نے فرمایا: ’’اگر کبھی میری آرمی ہوئی اور اُس پر میرا کنٹرول ہوا تو میں سب سے پہلے تمہیں فوج سے نکال دوں گا۔ کیوں کہ میری آرمی میں بے دماغ لوگوں کے لئے کوئی جگہ نہیں ہو گی۔‘‘
قائداعظم کا قول پاکستان کی مسلح افواج کے لئے رہنما اصول کی حیثیت رکھتا ہے۔ آزادی سے پہلے تاجِ برطانیہ کے وفادار سپاہیوں اور افسروں کے لئے یہی کافی تھا کہ وہ صرف دلیر ہوں، وہ صرف حکم مانیں اور دماغ سے نہ سوچیں۔ جنگ کی نوعیت بھی ایسی تھی کہ سوچنا لازمی نہیں تھا۔ آزادی کے بعد آزاد نظریاتی مملکت کی مسلح افواج کے لئے بہادر ہونا، دلیرہونا، وفادار ہونا بھی ضروری ہے اور روشن دماغ اور روشن ضمیر ہونا بھی، کیوں کہ وہ اس مملکتِ خداداد کی جغرافیائی سرحدوں کے بھی محافظ ہیں اور نظریاتی سرحدوں کے بھی۔ اُنہیں زمین کے ایک ٹکڑے کی حفاظت ہی نہیں کرنی بلکہ زمین کا یہ پاک ٹکڑا جن تصوّرات اور عقائد کی حفاظت اور نشوونما کے لئے بنا ہے اُن کی حفاظت کرنا بھی افواجِ پاکستان کا مقدس فرض ہے۔

______________

Hayat e Quaid e Azam New Edition

Prof Saeed Rashid Alig

Pages: 224

Year: 2021