کتاب: محمد رسول اللہ

مصنف: اعجاز احمد

امپورٹڈ کاغذ پر بہترین معیار کی طباعت

697 صفحات

زیر نظر کتاب ’’محمد رسول اللہ‘‘ایک ایسے قلم کار کی تالیف ہے جس کا تعلق لاہور کے ایک آسودہ حال علمی گھرانہ سے ہے۔ آپ کے والد گرامی سیرت کی معروف کتاب ’’رُخِ مصطفیٰﷺ‘‘اور کئی دیگر کتابوں کے مصنف تھے ۔
فاضل مصنف نہ صرف اندرون ملک بلکہ امریکہ جیسے ملک کی یونیورسٹیوں سے بھی اعلیٰ تعلیم یافتہ ہیں۔ ایک کاروباری شخصیت ہونے کے ساتھ ساتھ استاد کے اعلیٰ منصب پر بھی فائز ہیں۔ ملک کی مختلف جامعات میں مینجمنٹ اور مارکیٹنگ پڑھاتے ہیں۔ ایک کالج کے پرنسپل بھی رہ چکے ہیں جس کی وجہ سے نوجوان نسل کے نفسیاتی مسائل کو اچھی طرح سمجھتے ہیں اور معاشرے کے تمام حسن و قبح پہلوئوں کا عمیق مشاہدہ رکھتے ہیں جس کے مظاہر آپ کی کتاب میں جابجا نظر آتے ہیں۔
’’رُخِ مصطفیٰ ﷺ‘‘ کے مصنف کے زیر سایہ تربیتی مراحل طے کرنے کے باعث عشق رسول کی دولت گراں مایہ انہیں ورثہ میں ملی ہے۔ یہی وجہ ہے کہ رسول رحمتﷺ سے والہانہ عقیدت اور خلوص و محبت سے لبریز گہرا تعلق ’’محمد رسول اللہ‘‘ کے حرف حرف اور سطر سطر سے جھلکتا نظر آتا ہے ۔بقول محمود احمد کنگن پوری: ’’ علمی گہرائی، وسعت مطالعہ، عمیق فکر، اسلوب نگارش، انداز فکر، مؤرخانہ بصیرت اور ذوق انتخاب میں جو شان و مقام اور فضل و کمال اللہ کریم نے محترم اعجاز احمد کو عطا کیا ہے وہ کمال وہ بہت ہی کم لوگوں کو میسر ہے‘‘۔
محترمہ رخسانہ بشیر نے کیا خوب کہاہے: ’’دلوں کو اللہ کریم اور اس کے حبیب لبیبﷺ سےجوڑنے والے کیسے ہوتے ہیں، اگر آپ جاننا چاہتے ہیں تو کتاب ’’محمد رسول اللہ‘‘ کے مؤلف کو دیکھ لیں‘‘۔
کتاب بارے لکھتی ہیں: ’’لکھنے والا جب لکھتے لکھتے جذب کی کیفیت میں ڈوب جائے، آنسوئوں سے بھیگ جائے، رُئواں رُئواں بارگاہ الٰہی میں ملتجی ہو جائے تو پھر لفظ لفط نہیں رہتے تاثیر بن جاتے ہیں، یہی تاثیر ’’محمد رسول اللہ‘‘میں نظر آتی ہے۔
یہ کتاب ایک ایسی کہانی ہے، ایسا اسلوب ہے جو آپ کی روزمرہ زندگی اور ترجیحات کو بدل دیتا ہے۔ سوچ، خیال، عمل، دھیان، مصروفیت سب کو تبدیل کر دیتا ہے‘‘۔
فاضل مصنف کے نمایاں کارناموں میں سیرت لائبریری کا قیام بھی ہے جو ایک ڈیجیٹل لائبریری ہے۔ مگر اب رسول اللہﷺ کی سیرت پاک پر لکھی گئی کتاب ’’محمد رسول اللہ‘‘ہی ان کا سب سے بڑا حوالہ ہے۔
رسول اللہﷺ کے سیرت نگاروں کا ایک طویل زریں سلسلہ ہے ۔جناب اعجاز احمد اس سلسلہ کی ایک حسین کڑی ہیں۔ انہوں نے جس من موہنے انداز میں بارگاہ رسالت مآبﷺ میں سپاس عقیدت و محبت پیش کیا ہے ،یہ انہی کا حصہ ہے۔ ہر دور میں علمائے کرام نے اپنے اپنے انداز میں سیرت النبیﷺ پر کتب تصنیف کیں، ان میں سے کچھ تو اس قدر تفصیلی اور مشکل زبان میں لکھی گئی ہیں کہ ایک عام انسان ان کے مطالعہ کی ہمت ہی نہیں کر پاتا ۔ کچھ اس قدر مختصر ہیں کہ ذہن کی رسائی حیات نبوی ﷺکے اہم گوشوں تک نہیں ہو پاتی۔ اس لیے ایک ایسی کتاب کی شدت سے ضرورت محسوس کی جا رہی تھی جو محبت رسول سے معمورآسان، عام فہم اور جامع ہو نے کے ساتھ ساتھ زندگی کے ہر طبقہ کے لیے یکساں قابل استفادہ ہو اور اس کا مطالعہ دونوں جہاںکی سعادتوں، برکتوں اور کامیابیوں کا ضامن ہو۔کتاب ’’محمد رسول اللہ‘‘اس ضرورت کو خوب پورا کرتی ہے۔ اس کتاب بارے اہل علم نے اپنے اپنے انداز میں بہت خوبصورت اورایمان افروز آراء دی ہیں۔

بہت کم کتابیں ایسی ہیں جو آسان زبان میں عام آدمی کی فہم کوسامنے رکھ کر لکھی گئی ہوں۔ اُردو میں شبلی نعمانی کی سیرت النّبی سے لےکر آج تک یہ شعبہ بہت تشنہ تھا۔ اِس تشنگی کو اعجاز احمد صاحب نے ایسی خوبصورتی سے ختم کِیا ہے کہ دِل و روح کو سیراب کردیا ہے۔ــ اوریامقبول جان، کالم نگار

سیرت رسولﷺ پرلکھی گئی کتاب ’’محمد رسول اللہ‘‘ سادہ، خوبصورت اور دلنشیں ہے۔ کسی بھی نقطہ نظر سے پڑھیں، اِس میں مصنف کا خلوصِ قلب جھلکتا ہے۔ واقعات مستند ہیں اور انداز ِ بیاں منفرد۔ ایسی توضیحات ہیں جو عمومی کتب تاریخ میں نہیں ملتیں۔ پروفیسر احمد رفیق اختر

محترم اعجاز احمد نے اپنے ذاتی تاثرات و تصوّرات کو داخل کئے بغیر سیرت الّنبی کو اِسی طرح مدوّن کِیا ہے جس طرح معتبر اسانید اور متون میں مذکور ہے۔ مزید یہ کہ دلکش اُسلوب، حُسنِ ترتیب اور زبان کی روانی جیسی خصوصیات نسلِ نَو کے لیے نہایت ہی موزوں ہیں۔ پروفیسر ڈاکٹر احمد القاضی، الازہر یونیورسٹی، قاہرہ، مصر

آج کے دور میں ضرورت تھی ایک ایسی کتاب ِسیرت کی جو عصر حاضر کے انسان بالخصوص نوجوان نسل کی ذہنی و نفسیاتی صورتحال اور ان کے سوچنے سمجھنے کے انداز کو پیش نظر رکھ کر روزمرہ کے محاورہ میں لکھی جاتی، جس میں حیات نبویﷺ کے اہم گوشوں پر روشنی ڈالی جاتی اور اس کا مطالعہ ذہن و فکر کے زاویوں کو جلا بخشتا ۔ زیر نظر کتاب اس ضرورت کو پورا رکرتی ہے۔ پیر محمد امین الحسنات شاہ، سجادہ نشین آستانہ عالیہ بھیرہ، ضلع سرگودھ

محمد رسول اللہ ــــ خوئے دل نوازی سے آراستہ محبت کی کیفیت، احوال کا اظہار اور عقیدت و محبت کی چاشنی میں گوندھی ہوئی عطر بیز تصنیف ہے۔ ڈاکٹر سیدہ سعدیہ ، انچارج ادارہ عربی علوم اسلامیہ گورنمنٹ کالج ویمن یونیورسٹی سیالکوٹ

قوم عرب کی تہذیب، ثقافت اور اس دور کے احوال بیان کیے گئے ہیں جس سے حضور اقدسﷺ کی پوری زندگی کو سمجھنے میں مدد ملتی ہے۔ مولوی عبدالوہاب، قرآن اکیڈمی، لاہور

صاحبو! ’’محمد رسول اللہ‘‘ ایک کتاب نہیں….. ایک کیفیت ہے، زمانہ ہے، منظر ہے، خوشبو ہے، سحر ہے، نور ہے، فیض ہے، نظر کرم ہے، عطا ہے، حصّہ ہے، وسیلہ ہے، قرب ہے، باطن کا اُجالا ہے، جو رسول اللہ سے دُور ہیں، اُنہیں یہ کتاب قریب کرتی ہے اور جو قریب ہیں انہیں قریب تر۔ خود سے لکھی گئی کتاب اور قدرت کی طرف سے لکھوائی گئی کتاب میں کیا فرق ہوتا ہے اس کتاب کو پڑھتے ہوئے واضح طور پر محسوس ہوتا ہے۔‘‘ رخسانہ بشیر، براڈ کاسٹرریڈیو پاکستان، لاہور

Muhammad Rasoolullah

Ejaz Ahmad

Muhammad Rasoolullah | Ejaz Ahmad | محمد رسول اللہ | اعجاز احمد