سِوائے مردانِ خام بیدلؔ، کہ ہیں زمانے میں عام بیدلؔ
نہ پہنچا میرا کلام بیدلؔ، اَدا شناسانِ شاعری تک

ایک فرانسیسی مفکر کا مشہور قول ہے کہ خوب صورت ترجمہ حسین عورتوں کی طرح ہوتا ہے جو بے وفا ہوتی ہیں۔ فارسی زبان خوبیِ اختصار کا جوپیرایہ فراہم کرتی ہے، اُردُو زبان کو وہ اجمالی آہنگ میسّر نہیں ہے۔ زبانِ پہلوی کی ہم زَبانی ہو نہیں سکتی۔ اسی لیے فارسی اشعار کا منظوم اُردُو ترجمہ کر تے ہوئے بڑے دُشوار مرحلوں اور بہت سخت مَقامات کا سامنا کرنا پڑ تاہے۔ مَیں سمجھتا ہوں کہ بےشمار کٹھنائیوں کے باوجود نعیم حامد علی بیش تر اشعارکے تر جمے میں بہت کامیاب رہے ہیں۔ اُن کا ترجمہ خوب صورت ہوتے ہوئے بھی اصل اشعار سے وفا داری کرتا دکھا ئی دیتا ہے۔ نعیمؔ حامد علی نے زیادہ تر کو شش یہ کی ہے کہ لفظی ترجمے سے حتی الامکان گُریزکِیا جائے اور اُردُو شعر میں فارسی شعر کا مفہوم منتقل کِیا جائے اور اُردُو زَبان میں وہ Expression تلاش کِیا جائے جو فارسی کا متبادِل ہو سکے۔ نعیمؔحامد علی نے بیدلؔ کے کئی شعروں کا ترجمہ اِس خوبی سے کِیا ہے کہ تر جَمے کا گمان تک نہیں ہوتا اور شعر بالکل طبع زاد معلوم ہو تا ہے۔ نعیمؔماشاء اللہ خود بھی ایک نغز گو شاعر ہیں اورشعریت کے جملہ لوازمات کا بھرپور اِدراک رکھتے ہیں۔ وہ بیدلؔ کے اشعار کا ایسامنظو م اُردُو ترجمہ کرنے میں کامیاب رہے ہیں جسے بغیر کسی جھجک کے معیاری کہا جا سکتا ہے۔ میں سمجھتا ہوں کہ ’’بہار ایجادیِ بیدلؔ‘‘ بیدلؔ شناسی کے میدان میں ایک اہم کارنامہ ہے۔ مَقامِ افسوس ہے کہ پاکستان کا محکمۂ تعلیم فارسی زَبان و ادب سے ایسی بے اعتنائی کا مرتکب ہو رہا ہے کہ ہمارا ہزار سالہ حافظہ معرضِ خطر میں ہے۔ فارسی کے بغیر اُردُو پر بھی گرِفت مضبوط نہیں ہو سکتی اور سعدیؔ، حافظؔ، غالبؔ اور اقبالؔ سے بھی مستقیم را بطہ ممکن نہیں رہتا۔ ایسی صورت ِحال میں بیدلؔجیسے عظیم شاعر اور مثالی معلّمِ اخلاق کے احوال و آثار کی جمع آوری اور اُس کے اخلاقی آہنگ پر مبنی اشعارکا اُردُو میں یہ خوب صورت منظوم ترجمہ ذوقِ فارسی کی تشویق اور تعمیرِسیرت کے لحاظ سے بھی ایک ایسی سعیِ مسعود ہے جس کی جتنی بھی قدر کی جائے کم ہے۔ میں سیّد نعیمؔ حامد علی اَلحامدکو اِس کتاب کی اشاعت پر صمیمانہ ہدیۂ تبریک پیش کرتا ہوں۔ (انور مسعود)

اشعار بیدل | فارسی متن مع اُردو ترجمہ و سوانح حیات
شاعر: ابوالمعانی میرزا عبدالقادِر بیدل
تحقیق و ترجمہ :ڈاکٹر سیّد نعیم حامد علی اَلحامد
آرٹ پیپر پر خوصورت اور معیاری اشاعت
رنگین تصاویر | بڑا سائز | کلاتھ بائنڈنگ

.........................

چوں فنا نزدِیک شُد، مشکل بود ضبطِ حواس
دَر دَمِ پَرواز، بال و پَر، پریشاں می شوَد
ترجمہ
رَہیں اَوسان قائم، وقتِ آخر غیر ممکن ہے
دَمِ پَرواز بال و پَر، پریشاں ہو ہی جاتے ہیں!

----

اگر دشمن تواضُع پیشہ است، ایمن مشو بیدلؔ
بخوں ریزی بود بے باک، شمشیرِ کہ خم دارَد
ترجمہ
تواضُع سے اگر پیش آئے دشمن، خوش نہ ہو بیدلؔ
کہ شمشیرِ خمیدہ اور بھی خوں ریز ہوتی ہے!

----

اِمروز قدرِ ہر کَس، مقدارِ مال و جاہ است
آدم نمی تواں گُفت، آں را کہ زَر نباشَد
ترجمہ
کِیا جاتا ہے جاہ و مال سے عِزّت کا اندازہ
جو بے زَر ہے اُسے اِس دَور میں انساں نہیں کہتے

.......................................

Ashaar e Bedil | Manzum Urdu Tarjuma