Hazrat Usman Ghani | حضرت عثمان غنی رضی اللہ عنہ

سیّدنا عثمان غنی رضی اللہ عنہ کی شخصیت پر مایۂ ناز مصری سکالر محمد حسین ہیکل کی تحریر کردہ بہترین کتاب، نایاب تصاویر سے مزین ایڈیشن!
مترجم: پروفیسرحکیم مرزا صفدر بیگ

-----------------------------------------------------------------------------------

حزیفہ بن الیمان، خلافتِ عثمانی کے دوسرے یا تیسرے سال آرمینیا اور آذربائیجان میں مسلمانوں کے ساتھ مل کر جنگ کر رہا تھا اور اس جنگ میں شامیوں کی ایک جماعت قرآن کو مقداد بن اسود رضی اللہ تعالیٰ عنہ اور ابوالدرداء کی قرات کے مطابق پڑھتی تھی اور عراقیوں کی ایک جماعت ابن مسعودرضی اللہ تعالیٰ عنہ اور ابو موسیٰ اشعری رضی اللہ تعالیٰ عنہ کے مطابق۔ اس وجہ سے ان کے درمیان اختلاف ہو گیا کہ یہاں تک کہ ایک شخص اپنے دوسرے ساتھ سے کہتا:
"میری قراْت تیری قراْت سے بہتر ہے۔"
یہ بات اس حد تک بڑھی کہ فتنے کا اندیشہ ہوا۔ حذیفہ فوراََ مدینہ پہنچا اور حضرت عثمان رضی اللہ تعالیٰ عنہ سے عرض کی:
"اس امت کو ہلاکت سے بچا لو"
حضرت عثمان رضی اللہ تعالیٰ عنہ نے کہا:"یہ امت کس وجہ سے ہلاک ہو رہی ہے؟"
اس نے جواب دیا"کتاب اللہ کی وجہ سے، میں جنگ میں حاضر ہوا تھا اور میں کچھ عراقیوں، شامیوں اور حجازیوں کے ساتھ رہا ہوں، پھر ان کے اختلافِ قرات کا ذکر کیا جس کے متعلق بیان ہو چکا، پھر کہنے لگا ککہ مجھے خدشہ ہے کہ وہ بھی اپنی کتاب میں اسی طرح اختلاف کرنے لگیں گے جیسے یہود و نصاریٰ نے کیا تھا۔"
حضرت عثمان رضی اللہ تعالیٰ عنہ نے خطرہ محسوس کیا تو لوگوں کو اس بارے میں مشورہ کے لئے جمع کیا۔ انہوں نے آپ رضی اللہ تعالیٰ عنہ کی رائے دریافت کی تو آپ رضی اللہ تعالیٰ عنہ نے فرمایا،
"میری رائے یہ ہے کہ لوگ ایک قراْت پر متفق ہو جائیں۔ جب آج تم لوگ اختلاف کرتے ہو تو جو لوگ تمہارے بعد آئیں گے وہ تم سے زیادہ اختلاف کریں گے۔"
اہل الرائے نے آپ رضی اللہ تعالیٰ عنہ کی رائے کو قبول کر لیا تو آپ رضی اللہ تعالیٰ عنہ نے حضرت حفصہ رضی اللہ تعالیٰ عنہا کی طرف آدمی بھیجا کہ ان سے کہے کہ وہ مصحفِ ابوبکر رضی اللہ تعالیٰ عنہ کو میرے پاس بھیج دیں تا کہ اسے دیگر مصاحف میں لفظ بہ لفظ نقل کیا جائے۔ مصحفِ ابی بکر رضی اللہ تعالیٰ عنہ حضرت ابوبکررضی اللہ تعالیٰ عنہ کی زندگی میں ان کے پاس تھا، پھر حضرت عمر بن الخطاب رضی اللہ تعالیٰ عنہ کےپاس رہا اور پھر ام المومنین حضرت حفصہ رضی اللہ تعالیٰ عنہا کے پاس آ گیا۔
حضرت عثمان رضی اللہ تعالیٰ عنہ نے زید بن انصاری رضی اللہ تعالیٰ عنہ کو مصحف لکھنے کا حکم دیا اور یہ کہ سعید بن العاص رضی اللہ تعالیٰ عنہ، حضرت عبداللہ بن زبیر رضی اللہ تعالیٰ عنہ اور حضرت عبدالرحمٰن بن الحارث ابن ہشام مخزومی رضی اللہ تعالیٰ عنہ کی موجودگی میں املا کروائیں۔ جب انہوں نے قراْتِ واحدہ پہ اس کی کتابت مکمل کر لی تو حضرت عثمان رضی اللہ تعالیٰ عنہ نے حکم دیا کہ شامیوں، مصریوں، بصریوں، کوفیوں کے لئے ایک ایک نسخہ لکھو۔ آپ رضی اللہ تعالیٰ عنہ نے ایک نسخہ مکہ بھیجا، ایک یمن میں اور ایک مدینہ میں رکھا۔
جب آپ رضی اللہ تعالیٰ عنہ نے مصاحف کو شہروں میں بھجوایا اور ان کی قرات کے مطابق پڑھنے کو واجب قرار دیا۔ اس کے بعد آپ رضی اللہ تعالیٰ عنہ نے ان کے علاوہ جو مصحف تھے ان کو جمع کرنے کا حکم دیا اور جلا دیا۔ اس بات پہ کچھ لوگوں نے اختلاف بھی کیا۔ لیکن حضرت عثمان رضی اللہ تعالیٰ عنہ نے قراَتِ واحدہ پر لوگوں کو جمع کرنے کے لئے جو کام کیا وہ عین حکمت ہے۔ حضرت علی بن ابی طالب رضی اللہ تعالیٰ عنہ سے مصاحف جلانے کے متعلق جب دریافت کیا گیا تو آپ رضی اللہ تعالیٰ عنہ نے فرمایا:
"اگر وہ ایسا نہ کرتے تو میں ضرور کرتا۔"
اس کے باوجود بعض لوگوں نے مصاحف جلانے کی وجہ سے حضرت عثمان رضی اللہ تعالیٰ عنہ کی برائی بیان کرنے میں مبالغہ سے کام لیا تو حضرت علی رضی اللہ تعالیٰ عنہ نے لوگوں میں کھڑے ہو کر فرمایا:
"اے لوگو! حضرت عثمان رضی اللہ تعالیٰ عنہ کے بارے میں بہت زیادہ مبالغہ سے بچو۔ کہتے ہو اس نے مصاحف کو جلا دیا ہے۔ خدا کی قسم! اس نے رسولِ کریم صلی اللہ علیہ و آلہ وسلم کے اصحاب کے مشورے سے انہیں جلایا ہے اور اگر وہ کام مجھے سونپا جاتا جیسا کہ انہیں سونپا گیا تو میں بھی وہی کرتا جو انہوں نے کیا۔"

(اقتباس: حضرت عثمان غنی رضی اللہ تعالیٰ عنہ از محمد حسین ہیکل مترجم: پروفیسرحکیم مرزا صفدر بیگ)