کتابِ دِل و دنیا | کلیات افتخار عارف

---------------------------------------------------------

کتابِ دل و دنیا، پاکستان کے مشہور و معروف شاعر افتخار عارف کی شاعری کی کلیات ہے۔ افتخار عارف نہ تو ذود گو ہیں اور نہ انھیں ہمہ وقت زیرِ طباعت رہنے کا ہوکا ہے۔ گزشتہ چار عشروں کے دوران اُن کے صرف چار مجموعے منظرِ عام پر آئے ہیں یعنی: مہر دو نیم، حرفِ باریاب، شہرِ علم کے دروازے پر اور جہانِ معلوم۔ انہیں چار مجموعوں پر مشتمل یہ کتاب ہے۔

کتاب میں افتخار عارف اور ان کی شاعری پر فیض احمد فیض، ممتاز مفتی، مشتاق احمد یوسفی، اختر الایمان، سلیم احمد، علی سردار جعفری، کیفی اعظمی، مُشفق خواجہ، گوپی چند نارنگ، ابوالخیر کشفی، فتح محمد ملک اور این میری شمل جیسے جّید بزرگ نے کلمات لکھے ہیں۔

----------------------------------------------------------

قِصّہ ٴاہلِ جنُوں کوئی نہیں لِکّھے گا

جیسے ہم لِکھتے ہیں، یُوں کوئی نہیں لِکّھے گا

وَحشتِ قلبِ تپاں کیسے لکھی جائے گی!

حالتِ سُوزِ دَرُوں، کوئی نہیں لِکّھے گا

کیسے ڈھہ جاتا ہے دل، بُجھتی ہیں آنکھیں کیسے؟؟

سَر نوِشتِ رگِ خُوں، کوئی نہیں لِکّھے گا

کوئی لِکّھے گا نہیں ، کیوں بڑھی، کیسے بڑھی بات؟؟

کیوں ہُوا درد فزُوں؟ کوئی نہیں لِکّھے گا

خلقتِ شہر سَر آنکھوں پہ بِٹھاتی تھی جنہیں

کیوں ہُوئے خوار و زبُوں؟ کوئی نہیں لِکّھے گا

عرضیاں ساری نظر میں ہیں رَجَز خوانوں کی

سب خبر ہے ہمیں، کیُوں کوئی نہیں لِکّھے گا

شہر آشُوب کے لکھنے کو جگر چاہیے ہے

مَیں ہی لِکُّھوں تو لکُھوں، کوئی نہیں لِکّھے گا!

بے اثر ہوتے ہُوئے حرف کے اِس موسِم میں

کیا کہُوں،کس سے کہُوں، کوئی نہیں لِکّھے گا

✿✿✿✿✿✿✿

دل کو دِیوار کریں، صبر سے وحشت کریں ہم

خاک ہو جائیں جو رُسوائی کو شُہرت کریں ہم

اِک قیامت کہ تُلی بیٹھی ہے پامالی پر

یہ گُزرلےتوبیانِ قد وقامت کریں ہم

حرف ِ تردید سے پڑ سکتے ہیں سَو طرح کے پیچ

ایسے سادہ بھی نہیں ہیں کہ وضاحت کریں ہم

دل کے ہمراہ گزارے گئے سب عُمرکے دِن

شام آئی ہے تو کیا ترکِ محُبت کریں ہم

اک ہماری بھی امانت ہے تہ ِ خاک یہاں

کیسے ممکن ہے کہ اس شہر سے ہِجرت کریں ہم

دن نکلنے کو ہے چہروں پہ سجا لیں دُنیا

صُبح سے پہلے ہر اِک خواب کو رُخصت کریں

شوق ِآرائش ِ گل کایہ صلہ ہے کہ صبا

کہتی پھرتی ہے کہ اب اور نہ زحمت کریں ہم

عُمر بھر دل میں سجائے پھرے اوروں کی شبیہ

کبھی ایسا ہو کہ اپنی بھی زیارت کریں ہم

افتخار عارف

Kitab e Dil o Duniya | کلیات افتخار عارف