میجر محمد اکرم شہید | نشانِ حیدر | مصنف: پروفیسر سعید راشد علیگ

شہید کی زندگی سے جڑی نادر و نایاب تصاویر سے مزین دنیا کے بہترین کاغذ پر

دلکش اشاعت | آرٹ پیپر | چار رنگہ تصاویر | دو رنگہ طباعت

قیمت خاص کوالٹی ایڈیشن 999 روپے

کچھ کتاب کے بارے میں:

1983ء میں میرا سپاہی بیٹا (میجراحتشام ضمیر جعفری) سٹاف کالج کوئٹہ میں کورس کر رہا تھا۔ میں اس سے ملنے گیا تو کتابوں کے شیلف میں اُردو کی تین نئی کتابیں نظر آئیں: (۱)تذکرئہ شہداء(۲)کرنل حق نواز کیانی شہید ستارئہ جرأت (۳)میجر اکرم شہید نشانِ حیدر۔ مجھے وہاں پوتے پوتیوں سے مکالمے اور ان کتابوں کے مطالعہ کے سوا کوئی کام نہ تھا۔ میں نے سب سے پہلے انہی کتابوں پر ’’ہاتھ صاف‘‘ کیا، ہم نے ’’ہاتھ صاف‘‘ کیا تھا۔ کتابوں نے ہمارا ذہن روشن کر دیا۔ جس کتاب کو ایک بار کھولا اس کو ختم کیے بغیر بند نہ کر سکا۔ ان کے صفحات میں بسی ہوئی میرے وطن کی محبوب اور مقدس خوشبو نے دامنِ دل کو برابر کھنچے رکھا۔ یہ تینوں کتابیں جنگ ستمبر و دسمبر کے غیور شہدا کے سوانحی تذکروں پر مشتمل ہیں۔ یہ تذکرے ہماری قومی تاریخ کے سفر میں منارہ نور کی حیثیت رکھتے ہیں۔ مستقبل کے ’’گلاب‘‘ ماضی کے انہی زخموں سے طلوع ہوں گے۔ فاضل مصنف قومی سطح پر ہمارے شکریے کے مستحق ہیں کہ انہوں نے ایک اہم ملّی فرض(بلکہ قرض) کو اتنی لگن اور خوبی سے ادا کرنے کی کوشش کی ہے۔ میں امید کرتا ہوں کہ ہماری نوجوان نسل کے ملّی ذہن کی تربیت اور وسیع معنوں میں ’’پاکستانیت‘‘ کے فروغ میں ان کتابوں کا مطالعہ نتیجہ خیز ثابت ہو گا۔

(_سیّد ضمیر جعفری_)

یہ کتاب بہت محنت اور سلیقے سے مرتب کی گئی ہے۔ شہید کی پوری زندگی، خیالات، شخصیت کی ارتقائی منازل اور آخری معرکے کی جزئیات بہت عمدہ طریقے سے بیان کی گئی ہیں۔ ان کی شہادت کے واقعہ کو سعید راشد صاحب نے بہت ہی مؤثر اور جامع انداز میں بیان کیا ہے۔ اگر یہ مثال بے موقع نہ ہو تو عرض کروں گا کہ مصنف نے ایکشن کے بعد رِی پلے اتنے مختلف زاویوں سے دکھایا ہے کہ پورا منظر کتاب کی سطروں میں زندہ اور متحرک ہو گیا ہے۔

(_امجد اسلام امجد_)

میجرمحمداکرم شہید قوم کے ان عظیم شہیدوں میں سے ایک ہیں جو اب تک نشانِ حیدر کے عظیم اعزاز سے سرفراز ہوئے ہیں۔ اس لحاظ سے اکرم قوم کے ایک بہت بڑے محسن اور ہیرو ہیں اور چونکہ اکرم1971ء میں مشرقی پاکستان میں پاک سرحدوں کی حفاظت کرتے ہوئے شہید ہوئے اور نشانِ حیدر حاصل کیا۔ اس لیے وہ ایک فرد ہی نہیں بلکہ ان تمام ان گنت مجاہدوں، غازیوں اور شہیدوں کی تگ و تاز کی ان مٹ علامت ہیں جنھوں نے اس خطۂ ملک کو بچانے کے لیے وہ سب کچھ کیا جو وہ کر سکتے تھے۔ ایسی کتاب کی مدتوں سے ضرورت تھی جو ان جوانوں اور جیالوں کی سرفروشانہ جدوجہد کی ایک جھلک دکھا سکے۔ یہ کتاب یہ ثابت کرنے کی کوشش ہے کہ ہیرو آسمان سے نہیں اُترتے۔ زمین ہی سے پیدا ہوتے ہیں۔ وہ عام سے انسان ہوتے ہیں ان میں انسانی کمزوریاں بھی ہوتی ہیں وہ کبھی کبھی امتحانوں میں فیل بھی ہو جاتے ہیں اور بعض مقابلوں میں کمزور بھی رہتے ہیں لیکن ان کی نگاہ بلند اور جان پُرسوز ہوتی ہے۔ وہ اپنے عزم و حوصلے سے، سوز یقین کی قوت سے آگے بڑھتے ہیں۔ ان کی امیدیں قلیل اور مقاصد جلیل ہوتے ہیں وہ اپنے پیروں پر کھڑا ہونا جانتے ہیں اور وہ اپنے زور بازو پر اعتماد رکھتے ہیں۔ انہیں معلوم ہوتا ہے کہ سوال سے خودی ضعیف ہوتی ہے اور زندگی میں ان کا رویہ احسان اور ایثار کا ہوتا ہے۔ اس پاک وطن کی پاک سرحدوں کو مضبوط اور محفوظ بنانے کے لیے ہمیں ہمیشہ میجراکرم جیسے بہادر اور سرفروش نوجوانوں کی ضرورت پڑتی رہے گی۔ اس لیے لازمی ہے کہ ہم اپنے گھروں میں اور اپنے اداروں میں ایسے نوجوانوں کی پرورش و پرداخت کرتے رہیں جن کا دل بیدار ہو۔ اکرم نشانِ حیدر چونکہ ملٹری کالج کے فرزند تھے اس لیے یہ توقع بے جا نہ تھی کہ ملٹری کالج ہی کا کوئی قلم کار اٹھے اور اپنے نامور فرزند کی ایک موثر سوانح حیات مرتب کرے یہ فرض کفایہ اکرم کے ایک استاد پروفیسر سعید راشد نے پورا کیا اور حق یہ ہے کہ لکھنے کا حق ادا کر دیا۔ اس کاوش کے لیے وہ مبارک باد کے مستحق ہیں۔ شہیدوں پر ان کی یہ تیسری کتاب ہے۔ اللہ تعالیٰ ان کی یہ خدمت قبول فرمائے۔ آمین!!!

(_بریگیڈیر سیّدنصیرالدین_)
(ستارئہ امتیاز ڈائریکٹر آرمی ایجوکیشن

Major Muhammad Akram Shaheed | میجر محمد اکرم شہید