جہان دیدہ

مفتی محمد تقی عثمانی

۔۔۔۔۔۔۔۔۔۔۔۔۔۔۔۔۔

جہان دیدہ بیس ملکوں کا معلوماتی سفرنامہ ہے جو محترم مفتی محمد تقی عثمانی صاحب کی تصنیف ہے

یہ روداد ان ممالک کا احوال ہے جہاں جولائی 1978ء سے اکتوبر 1988ء کے دوران مختلف ادوار میں مصنف کا جانا رہا اور جو کچھ ایک عالمانہ آنکھ نے دیکھا اور سمجھا اسے بلا کم و کاست بیان فرما دیا۔ ان ملکوں میں عراق، سعودی عرب، مصر، الجزائر، شام، اردن، ترکی، سنگاپور، انڈونیشیا، بنگلہ دیش، قطر، چین، امریکہ، کینیڈا، برطانیہ، ہندوستان، جنوبی افریقہ، اور فرانس شامل ہیں۔

یہ کتاب جہان آپ کو وادی دجلہ و فرات سے اہرام مصر، جبل احد سے جبل قادسیون، غار اصحابِ کہف سے وادی مؤتہ، ایتھنز سے استنبول اور باسفورس، بیجنگ سے شہر ممنوعہ اور دیوار چین، جوہانسبرگ سے کیپ ٹاؤن، دیوبند سے لکھنؤ، مونٹریال سے ٹورنٹو اور نیاگرا آبشار، اور ویسٹ ورجینیا سے نیویارک، واشنگٹن اور شکاگو کی دلچسپ سیر کراتی ہے وہیں اسلامی تاریخ کے اہم مقامات، عظیم شخصیات کے مزارات اور ان کی زندگی کے ایمان افروز واقعات کا مختصر مگر انتہائی معلوماتی اور ایمان افروز تذکرہ بھی کرتی ہے۔

جنوبی افریقہ میں مرزائی حضرات کی طرف سے دائر کیے مقدمے کا احوال، چین میں اشتراکیت کا تجزیہ، یورپ اور امریکہ کے ترقی یافتہ مگر روح سے عاری معاشرے کے مثبت اور منفی پہلو اور اس سے جڑے دعوت و تبلیغ کے امکانات پر مفتی صاحب روشنی ڈالی ہے۔ ان کے دارالعلوم دیوبند سے پیدائشی، فکری و عملی، اور قلبی تعلق کے پیشِ نظر وہاں منعقد ہونے صد سالہ اجلاس کا ذکر بہت جذباتی ہے۔

ایک جگہ حضرت ابو سلیمان دارانی رحمۃ اللہ علیہ کا قول نقل کرتے ہیں کہ "دنیا اپنے سے بھاگنے والے کا پیچھا کرتی ہے، اگر وہ بھاگنے والے کو پکڑ لے تو زخمی کر کے چھوڑتی ہے، اور اگر طالب دنیا اسے پکڑ لے تو اسے قتل ہی کر ڈالتی ہے۔"

چین کی سالار کاؤنٹی جو ایک مسلم اکثریتی علاقہ ہے اور صوبہ چھینگ ہائی میں شامل ہے، کے بارے میں لکھتے ہیں کہ "صوبہ چھینگ ہائی میں اب تک کوئی غیر چینی وفد کبھی نہیں گیا تھا، بلکہ اس علاقے میں غیر ملکیوں کی آمد پہلے ممنوع تھی۔ کچھ عرصہ قبل ہی یہ صوبہ غیر ملکیوں کے لیے کھولا گیا ہے، اس لیے یہاں کے اکثر مسلمان کسی غیر چینی مسلمان کی صورت سے اب تک ناآشنا تھے، اور پہلی بار باہر کے کچھ مسلمانوں کو دیکھنے کے لیے ان کا بیتابانہ اشتیاق قابلِ دید تھا۔ مصافحے کے دوران متعدد افراد کی آنکھوں سے آنسو جھلکتے نظر آئے، اور جب امام صاحب نے اپنی خیرمقدمی تقریر میں اس بات پر پاکستان کا شکریہ ادا کیا کہ اس نے چینی مسلمانوں کو حج پر جانے کے انتظامات کیے ہیں تو ایک صاحب کو میں نے دیکھا کہ وہ پھوٹ پھوٹ کر رو پڑے۔"

مانٹریال میں میکگل یونیورسٹی کے شعبہ اسلامی علوم کے دورے کے تاثرات میں لکھتے ہیں "علم برائے علم جو محض جاننے کی حد تک محدود رہ کر ماننے اور جھکنے سے ناآشنا ہو، انسان کو کوئی فائدہ نہیں پہنچاتا۔ ایسا علم کائنات میں سب سے زیادہ ابلیس کو حاصل ہے، لیکن وہ اسے کفر اور جہنم سے بھی نہیں بچا سکا۔ اور جو علم انسان کو اپنے خالق ومالک تک پہنچا کر اسے ایمان بھی نصیب نہ کر سکے، اس پر خواہ مرغوب کن ڈگریوں کا کیسا دلفریب خول چڑھا ہوا ہو، کارزارِ حیات میں وہ انسان کے کسی کام کا نہیں۔"

یہ کتاب عمومی علم میں اضافے کے ساتھ ساتھ بین الاقوامی مسلم تنظیموں اور ان کے طریقہ کار کے حوالے سے آگاہی کے لئے بھی مفید ہے۔

بشکریہ فصیح الدین

Jahan e Deedah

Safarnama

Mufti Taqi Usmani

جہان دیدہ | سفرنامہ | مفتی محمد تقی عثمانی