غالب کی تخلیقی حسیت ایک ایسی کتاب ہے جو غالب پر لکھی جانے والی دیگر کتابوں سے بہت مختلف ہے۔ شمیم حنفی عام طور پر متن کے تجزیاتی اور لسانی مطالعے سے کوئی سروکار نہیں رکھتے۔ان کی نگاہ میں متن کی روح تک پہنچنے کا سب سے اہم وسیلہ متن کا گہرائی سے مطالعہ اور متن کی حسی دنیا میں خود کو داخل کرکرنا ہے۔ وہ مطالعہ غالب میں ادبی اور تاریخی تناظر کے ساتھ ساتھ متن کو ایک ذاتی تجربے کے طور پر بھی دیکھتے ہیں۔یہی وجہ ہے کہ شمیم حنفی کی غالب تنقید میں ایک قاری کی حسیت متن کی حسیاتی دنیا سے ہم آہنگ ہوتی نظر آتی ہے۔

شمیم حنفی نے کلام غالب کو کئی حوالوں سے دیکھنے کو کوشش کی ہے۔ان حوالوں میں ایک اہم حوالہ نو آبادتی فکر بھی ہے۔یہ کتاب ہمیں یہ بھی بتاتی ہے کہ غالب سے پہلے غزل کی دنیا میں کیسے کیسے فکری اور لسانی انقلابات آچکے تھے۔اسی طرح غالب کے معاصرین کا ایک حصہ بھی یہاں شامل ہے۔ان مضامین کو اگر ایک ساتھ پڑھا جائے تو احساس ہو گا کہ زمانی فاصلے کے باوجود فکر و خیال کی دنیا آنے والے دنوں پر اثر انداز ہوتی ہے اور ادب میں کسی نئ روایت کا آغاز پرانی روایت سے بے نیاز ہو کر ممکن نہیں۔اس طرح غالب کی تخلیقی حسیت غالب کے پیش رو اور غالب کے معاصر شعرا کے لسانی اور فکری میلانات سے یکسر بے تعلق نظر نہیں آتی ۔شمیم حنفی نے ایک خاص انداز نظر کے ساتھ اس کتاب کو پیش کیا ہے۔ اس لیے مختلف اوقات میں لکھے گئے یہ مضامین فکر سطح پر ایک وحدت قائم کرتے ہیں۔کشتگان غالب کے لیے غالب کا مطالعہ اس کتاب کے بغیر ادھورا ہے

Ghalib Ki Tehqeeqi Hissiat | Shamim Hanfi

غالب کی تخلیقی حسیت | شمیم حنفی