کلیات حبیب جالب کی تاریخ ساز اشاعت
پہلی مرتبہ مکمل مجموعہ کلام | 830 صفحات
اعلٰی کوالٹی پیپر
.
✍️ فیض احمد فیض
یہ طے ہے کہ حبیب جالب نے جو کچھ بھی کہا، حیرت انگیز حوصلے اور خلوص کے ساتھ کہا۔ یہ حوصلہ اسے صداقت کے اعتماد نے بھی دیا اور مُلک کے اُن عوام کی حمایت نے بھی جن کی محرومیاں اور جن کے بنیادی حقوق کی پامالی جالب کی شاعری کا موضوع بنی اور اُس نے اتنی مقبولیت حاصل کی کہ وہ اپنی زندگی ہی میں ایک لیجنڈ بن گیا۔ یہ شہرت اور مقبولیت اور عزت اُس پر آسمان سے نہیں پھٹ پڑی تھی۔ اُس نے یہ سب کچھ بے شمار قربانیاں دے کر حاصل کیا کہ اُس کی عظیم جدوجہد ہی اُس کا استحقاق تھا۔ پاکستان کی ادبی اور سیاسی تاریخ میں اُس کا نام اور کام ہمیشہ زندہ رہیں گے۔
✍️ احمد ندیم قاسمی
حبیب جالب ان خوش نصیبوں میں سے ہے جو خود بھی پابندِ سلاسل رہے اور جن کی تحریروں پر بھی قدغن رہی۔ اُس زمانے کے آمروں کو شاید اس کا علم نہ تھا کہ صدیوں پہلے بیتائل کے بندی خانے میں کتابیں بھی پا بہ زنجیر کی جاتی تھیں۔ انھیں معلوم ہوتا تو پیروی میں وہ بھی اس کی کتابوں کو کوٹ لکھپت جیل میں یا شاہی قلعہ کے تہ خانوں میں زنجیروں سے جکڑ کر رکھتے اور خوش ہوتے کہ وہ صرف جالب کو ہی ہتھکڑیاں اور بیڑیاں پہنانے میں کامیاب نہیں ہوئے ہیں، اُنھوں نے اس کے لکھے ہوئے لفظوں کو بھی آہنی زنجیروں کا اَسیر کیا ہے۔ خوشبو کو بیڑیاں پہنائی ہیں، روشنی کو ہتھکڑیاں ڈالی ہیں اور زندگی کے گلے میں طوقِ غلامی آویزاں کیا ہے۔
✍️ زاہدہ حنا
اُردو زبان نے نظیر اکبر آبادی کے بعد اگر سچ مُچ کوئی عوامی شاعر پیدا کیا ہے تو وہ حبیب جالب ہے۔ نظیراکبر آبادی کی طرح وہ بھی عوامی انسان ہیں۔ ان کا رہن سہن عوامی ہے، ان کے سوچنے اور محسوس کرنے کا انداز عوامی ہے، ان کی قدریں عوامی ہیں۔ ان کی محبتیں اور نفرتیں عوامی ہیں اور وہ عوام کے دُکھ درد، آرزؤں اور اُمنگوں کی ترجمانی عوام ہی کی زبان میں کرتے ہیں۔ یہ جو ہزاروں لاکھوں انسان، حبیب جالب سے اتنا پیار کرتے ہیں اور ان کے اشعار سُن کر فرطِ جذبات سے بے قابو ہو جاتے ہیں تو ان کا پیار، ان کی وارفتگی بے سبب نہیں ہے۔
✍️ سبط حسن
اس وطن عزیز میں جو کچھ ہوا ہے اور مختلف لوگوں نے اس پر مختلف طریقوں سے جو ستم ڈھائے ہیں، اس کی تاریخ مرتب کی جائے تو اس میں حبیب جالب کے اس جہاد کا ذکر سنہرے حروف میں لکھا جائے گا جو اس نے جبر و استبداد کے خلاف کیا ہے۔ میرے نزدیک وہ ایک اہم شاعر ہی نہیں ایک اہم انسان بھی ہے کیونکہ اس نے خیر کی قدروں کے لیے قید و بند کی صعوبتیں تک اُٹھائی ہیں اور اپنا تن من دھن سب کچھ لٹا دیا ہے۔
✍️ ڈاکٹر عبادت بریلوی
حبیب جالب پاکستان میں عوام کی فکری آزادی کا سب سے بڑا نمائندہ اور سپاہی تھا جو ہمیشہ انقلاب اور آزادی کے گیت گاتا رہا۔ ظالم طبقوں کے چہرے ننگے کرتا رہا۔ اس نے اپنے افراد خانہ کی تربیت بھی اسی رنگ میں کی۔
✍️ قتیل شفائی
جالب نے ایک زمانے میں بہت خوبصورت شاعری کی ہے۔ نک سک سے درست، دلہن کی طرح آراستہ، فنی خوبیوں سے مرقع، دلوں میں اُتر جانے والی... شاعری کی یہ گلپوش راہ جالب پر بہت مہربان تھی مگر جالب نے دوسرے لبھانے والے راستوں کی طرح اس راہ سے بھی اپنا رُخ موڑ لیا۔ جان بوجھ کر اپنے طرزِ فکر کو ایک ایسا لہجہ دیا جو سب کا تھا، جسے سب نے اپنے دل کی آواز سمجھا اور جسے سمجھنے میں لاکھوں لوگوں کو کسی سہارے کی ضرورت نہیں پڑی اور ان کی ہر نظم مشاعرے کے اختتام پر ترانے کی شکل اختیار کرتی گئی۔ علامہ اقبال کے جشن صد سالہ کے موقع پر جالب نے کہا تھا۔ علامہ مرحوم میری ڈیوٹی لگا گئے تھے کہ ’’اُٹھو میری دنیا کے غریبوں کو جگا دو‘‘، میں اس ڈیوٹی کو بھگتانے کے سلسلے میں پندرہ بار جیل جا چکا ہوں۔
✍️ زہرہ نگاہ
حبیب جالب جنھیں سقراط کا انجام اچھی طرح معلوم تھا اس صورت میں حالات کے ساتھ مفاہمت نہ کر سکے۔ انھوں نے اپنی صریری غزل کا ریشمی ملبوس چاک کیا اور میدانِ عمل میں آ کر اس فرض کو تیشۂ عمل سے یوں ادا کیا کہ ان کی شاعری انقلابی حقیقت سے ہم آہنگ ہو گئی۔ حبیب جالب کی اس خدمت کو کون نظر انداز کر سکتا ہے؟
✍️ انور سدید
حبیب جالب کی شاعری جذبے کی ترسیل کا منظر نہیں دکھاتی بلکہ بجائے خود جذبے کا بے محابا اظہار ہے۔ اسی میں حبیب جالب کی جیت ہے کہ وہ اندر اور باہر سے ایک ہے اور جس شدّت سے وہ کسی بات کو محسوس کرتا ہے اسی شدّت سے اس کا برملا اظہار کرنے پر قادر بھی ہے۔
✍️ ڈاکٹر وزیر آغا
جالب کی شاعری کا پھیلاؤ اتنا ہی ہے جتنا پاکستان کے عوام کا، تیسری دنیا کے مظلوم اور ظلم کے خلاف صف آرا ہونے والے انسانوں کا۔ جہاں کہیں بھی ہو کچھ بھی ہو جالب وہیں ہوتا تھا، کراچی میں گولی چلے یا بنگال کی بگیا لہو لہان کی جائے۔ فلسطینی بے گھر ہوں یا لبنان جلے۔ طلبا شہر بدر کیے جائیں یا اخبار ضبط ہو۔ عورت کی حیثیت گرانے کا قانون بنے یا نیلو زنجیر پہن کر ناچنے سے انکار کر دے۔ جالب نظم لکھتا، مظاہروں میں جاتا، پولیس کی لاٹھیاں کھاتا، جمہوریت کی تحریک میں آگے آگے چلتا۔
✍️ افضل توصیف
حقیقتاً حبیب جالب عوامی طرز کے شاعر تھے۔ ان کا اپنا انفرادی رنگ اور تیور تھا، وطن کے دبے کچلے مظلوم اور پابندیوں کے اسیر عوام اور ان کی غلامانہ ذہنیت کو حبیب زیادہ دن تک نہیں جھیل پائے... محض شکوے گلے پر یقین نہ کرنے والے حبیب قلندر صفت انسان تھے... وہ میدانِ کارزار میں ڈٹے رہے، انھیں عوام کی مجبوریوں کا خیال رہا اور جو مسائل انھیں درپیش رہے انھیں پورٹریٹ کرنے میں انھیں کوئی دقت نہیں ہوئی... حبیب جالب نے اپنی شاعری سے عوام کے دل کو جیتا تھا اس لیے حبیب جالب کی مکمل شاعری کو انسانی بھائی چارگی اور عالمگیر برادری کے نام منسوب کیا جا سکتا ہے۔
✍️ مشرف عالم ذوقی
حبیب جالب جیسے بے باک و دلیر شاعر صدیوں بعد پیدا ہوتے ہیں اور اس میں تو کبھی دو آرا نہیں ہو سکتیں کہ حصولِ آزادی کے بعد برصغیر کی کسی زبان میں بھی اُن جیسا نڈر اور باضمیر شاعر پیدا نہیں ہوا جس نے مظلوم اور مجبور عوام کے لیے اربابِ اقتدار سے ٹکّر لی ہو اور اپنی زندگی کا طویل عرصہ قید و بند کی اذیتیں برداشت کرنے میں گزارا ہو۔ بلاشبہ وہ برصغیر کے واحد شاعر تھے جنھوں نے اپنا قلم ہی نہیں اپنی زندگی بھی عوام کے لیے وقف کر دی تھی۔
✍️ نند کشور وکرم

Kuliyat e Habib Jalib