Tareekh Adab e Urdu | تاریخ ادبِ اردو | 4 جلد مکمل سیٹ

تاریخ ادبِ اردو

ڈاکٹر جمیل جالبی

4 جلد مکمل سیٹ

پہلی جلد

تاریخ ادب اُردو کی یہ پہلی جلد ہے جو آغاز سے لیکر 1750ء تک قدیم اردو ادب کا احاطہ کرتی ہے۔ جس طرح سے ہم جدید ادب کو اس کی سیاسی، سماجی، تہذیبی، تاریخی اور لسانی نقطہ نظر سے پڑھتے ہیں، اسی طرح سے ہمیں قدیم ادب کی سیاسی، سماجی، اقتصادی و لسانی حیثیت سے مطالعہ کرنا ہے تاکہ ہم ادب کو اس کے صحیح پس نظر میں سمجھ سکیں۔ اور اس کی صحیح اہمیت کو جان سکیں۔ جمیل جالبی سے پہلے اس موضوع پر جتنی بھی ادبی تاریخیں لکھی گئی ہیں ان میں ہر ایک نے کسی نہ کسی اکائی کو سامنے رکھ کر کام کیا ہے۔ مگر جمیل جالبی نے ان سب کو ایک ہی نظر سے دیکھا اور برتا ہے ان کے نزدیک دہلی اور دکنی ادب میں کوئی فرق نہیں بلکہ ہر جگہ کا ادب اپنے یہاں حالات کو دیکھتے ہوئے پیدا ہوا ہے۔ جمیل جالبی کی یہ کوشش اور نیا طرزِ تحریر بہت کارگر ثابت ہوا اور انہوں نے اسی طرز پر اپنی بقیہ جلدیں بھی پوری کیں۔ جو یقیناً اردو ادب کے طالب علم کے لیے ایک اہم ماخذ اور سرمایہ ہے۔ جس نے اردو ادب کے طالب علم کو بہت سی آسانیاں مہیا کرائی ہیں کہ وہ صرف ایک کتاب کا مطالعہ کر کے پوری ادبیات کو جان سکتا ہے۔ اس لیے یہ کتاب بہت مقبول ہوئی اور اس کے قاری بھی بہت زیادہ ہیں۔

اس جلد کا خاکہ اس طرح بنایا گیا ہے کہ ساری تصنیف کو، ترتیبِ زمانی سے، چھے فصلوں میں تقسیم کیا گیا ہے۔ ہر فصل کے تحت مختلف ابواب آتے ہیں۔ ہر فصل کا پہلا باب پورے دور کی تمہید کی حیثیت رکھتا ہے جس میں اس دور کی تہذیبی، معاشرتی اور ادبی و لسانی خصوصیات کو اجاگر کیا گیا ہے تاکہ پڑھنے والے کے سامنے اس دور کی واضح تصویر آجائے۔ اس تمہیدی باب کی روشنی میں، ترتیبِ زمانی سے، اس دور کے ممتاز و نمائندہ شاعروں اور ادیبوں کے ذہن و اثرات اور ان کی تخلیقی کاوشوں کا تنقیدی مطالعہ کیا گیا ہے۔

چونکہ ہر دور کی نظم و نثر ایک ہی طرزِ احساس کا اظہار کرتی ہیں اس لیے، دوسری تاریخوں کے برخلاف، ان کا مطالعہ بھی ایک ساتھ ہی کیا گیا ہے۔ ہر شاعر و ادیب کو اس کی تاریخی و ادبی حیثیت کے مطابق صفحات دیے گئے ہیں۔ قدیم دور کے ادب کا مطالعہ اس لیے اور بھی دشوار تھا کہ اس دور کا بیشتر سرمایہ مخطوطات پر مشتمل ہے جن کے حوالے حواشی میں دیے گئے ہیں۔ یہی عمل مطبوعہ کتب کے ساتھ کیا گیا ہے۔ ’اختتامیہ‘ میں اختصار کے ساتھ روایت کے اتار چڑھائو کی داستان کو بیان کر دیا گیا ہے اور ساتھ ساتھ اردو زبان کے عالم گیر رواج کی منطقی وجوہ پر بھی روشنی ڈالی گئی ہے۔ آخر میں ضمیمے کے تحت ’’پاکستان میں اردو‘‘ کو موضوع بنا کر پاکستان کے چاروں صوبوں میں اردو کے گہرے تعلق اور قدیم روایت کا سراغ لگایا گیا ہے۔

دوسری جلد

تاریخ ادب اُردو کی یہ دوسری جلد ہے جسے پڑھنے والوں کی آسانی کی خاطر دو حصوں میں تقسیم کر دیا گیا ہے۔ یہ جلد، جو کم و بیش اٹھارویں صدی عیسوی کا احاطہ کرتی ہے، اپنی جگہ مکمل بھی ہے اور اگلی پچھلی جلدوں سے پوری طرح مربوط بھی۔ مصنف نے دوسروں کی آراء یا سنی سنائی باتوں پر ادبی تاریخ نویسی کی بنیاد نہیں رکھی بلکہ سارے کلیات، ساری تصانیف، کم و بیش سارے اصل تاریخی، ادبی و غیرادبی مآخذ سے براہِ راست استفادہ کر کے روحِ ادب تک پہنچنے کی کوشش کی ہے اور پوری ذمہ داری و شعور کے ساتھ، کم سے کم لفظوں میں، اسے بیان کر دیا ہے۔ جمیل جالبی نے اردو ادب کے طالب علم کو بہت سی آسانیاں مہیا کرائی ہیں کہ وہ صرف ایک کتاب کا مطالعہ کر کے پوری ادبیات کو جان سکتا ہے۔ اس لیے یہ کتاب بہت مقبول ہوئی اور اس کے قاری بھی بہت زیادہ ہیں۔ اکثر اس طرح کے کام ادارے کیا کرتے ہیں جن کے پاس بہت سے وسائل اور افرادی قوت ہوتی ہے، لیکن ایک اکیلے شخص کی طرف سے ایسا کارنامہ یقیناً حیران کُن ہے۔

ڈاکٹر جمیل جالبی کی زیر نظر کتاب ایسی کتاب ہے جو اُن کا نام صدیوں زندہ رکھے گی۔ اس کی تصنیف میں انہوں نے اتنی محنت کی ہے کہ انسان دیکھ کر حیران رہ جاتا ہے۔ خصوصی دلچسپی سے کمپیوٹر کمپوزنگ میں اس کی چاروں جلدیں طبع ہوگئی ہیں۔ یہ اس کتاب کی جلد دوم کا نواں ایڈیشن ہے۔ اس جلد میں زیر نظر دور کا بنیادی سنہ ہجری ہے، اسی لیے اس کو بنیادی طور پر استعمال کیا ہے، لیکن آج کے پڑھنے والوں کی سہولت کے لیے عیسوی سنین بھی ساتھ دے دیے ہیں۔ پڑھنے والوں کی آسانی کے لیے سارے حواشی بھی ہر باب کے آخر میں جمع کردیے ہیں اور ان کی ترتیب کے حوالے متن میں درج کردیے ہیں۔ ان حواشی میں کتابوں کے حوالوں کے علاوہ بعض مفید نکات بھی ملیں گے۔ بعض ایسے حوالے، جن کا مطالعہ قاری کے لیے ضروری تھا، اسی صفحے پر درج کردیے گئے ہیں۔ جلد دوم کی فہرست مختصر ہے لیکن ’’اشاریے‘‘ کی مدد سے، جو مفصل ہے، آپ اپنے حوالے یا موضوعات و شخصیات وغیرہ کو بہ آسانی تلاش کرسکتے ہیں۔ سارے موضوعات متعلقہ مصنف یا صنفِ ادب کے تحت درج کردیے گئے ہیں، اور جو ان کے علاوہ ہیں انہیں متفرق موضوعات کے تحت درج کردیا گیا ہے۔ اسی لیے ’’موضوعات‘‘ کا اشاریہ مختصر ہے۔ پہلے جلد دوم دو حصوں میں علیحدہ علیحدہ چھپی تھی، اب دونوں حصوں کو ایک جلد میں اکٹھا کردیا گیا ہے۔

تیسری جلد

تاریخ ادب اردو کی تیسری جلد انیسویں صدی کے نصف اول کا احاطہ کرتی ہے

چوتھی جلد

تاریخ ادب کی چوتھی جلد انیسویں صدی کے نصف آخر کے  اردو ادب کا احاطہ کرتی ہے۔

انیسویں صدی کا نصف آخر برعظیم کی تاریخ کا فیصلہ کُن دور تھا، مسلمان انگریز قابضین سے نجات کے خواہاں تھے۔

اس جلد میں مصنف نے قاری کو مختلف ادوار کی بہتر تفہیم کے لیے چار فصلیں اور کئی ابواب قائم کیے ہیں۔

Tareekh Adab e Urdu4 Volumes Set

Dr. Jameel Jalbi