قرآن اور سائنس

ڈاکٹر ہمایوں اصغر

سٹیفن ہاکنگ اور یووال نوح حراری کو جواب کے ساتھ

544 صفحات

قلم کتاب بے شک بلیک اینڈ وائٹ ہیں مگر کتاب کے ساتھ پڑھی اور سمجھی گئی چیز دیر پا اثر رکھتی ہے اور باطن میں رنگ ونور کو فروغ دیتی ہے۔ آئی ٹی ایج اور الیکٹرانک میڈیا ہائبرڈ وار کے ذریعے ہمارے گھروں اور بیڈرومز کے اندر پہنچ کر دل و دماغ کو مسخر کر رہے ہیں ۔ پرو پیگنڈہ کی اس اعصابی جنگ کا مقابلہ صرف وہی کر سکتے ہیں جن کے نظریات اور عقائد صحیح ہوں ۔ جن کے دل و دماغ میں سائنسی علمی اور عملی طور پر اپنے دین اور آئیڈیالوجی سے متعلق نہ کوئی ابہام ہو اور نہ کوئی احساس کمتری۔ ہم نے اس حقیر سی کاوش میں صرف روایتی سائنسی مضامین پر قلم اٹھایا ہے مگر سچ تو یہ ہے کہ دور جدید میں معاشیات، عمرانیات ، نفسیات وغیرہ جیسے روایتی آرٹس کے مضامین بھی ایک بھر پور سائنس بن چکے ہیں۔ ہم سے بہتر اہل علم و قلم ان پر حاشیہ آرائی کر چکے ہیں اور آئندہ بھی کرتے رہیں گے۔ قرآن کریم میں ساڑھے سات سو کے قریب آیات ایسی ہیں جو کسی نہ کسی طرح سائنسی مظاہر اور عوامل کے متعلق اشارہ کرتی ہیں مگر ہم اپنی علمی کم مائیگی کی وجہ سے ابھی تک ان تمام آیات کا احاطہ نہیں کر سکے۔ امید ہے کہ آنے والے موزوں وقت میں ان آیات کے اسرار بھی کھلتے چلے جائیں گے۔ اللہ اور اس کے آخری رسول ملی لی ہم نے کائنات کے اسرار اور حقائق میں غور و فکر اور تدبر و تفکر کرنے کا حکم دیا ہے۔ روایت ہے کہ ایک ساعت کا تفکر ایک رات کے قیام سے افضل ہے۔ جبکہ ایک اور روایت کے مطابق خالق کے عجائب میں غور و فکر، انسانیت اور مسلمانوں کی فلاح کے لیے سعی و جہد ساٹھ سال کی عبادت سے افضل ہے۔ کتاب کا آخری حصہ دُنیا بھر میں بیسٹ سیلر کتابوں کے مصنفین، سٹیفن ہاکنگ اور یو وال نوح حراری سے متعلق ہے۔ ان صاحبان علم کا تذکرہ اس مقصد کے لیے کیا گیا کہ اگر کوئی شخصیت اپنے علمی قلمی اور سماجی مقام کو استعمال کرتے ہوئے ہمارے خالق اور مالک کی موجودگی کا ہی انکار کر دے اور بڑے سوالوں کے غیر منطقی اور غیر فطری جواب دے جس سے خلق خدا کی گمراہی کا اندیشہ ہو اور انسان جیسی اعلیٰ و ارفع تخلیق کا شجرہ نسب جانوروں سے ملا دے تو ایسی صورت میں مدلل جواب دینا ہم پر لازم ہے، تاکہ سائنس اور اس کے قوانین مخلوق اور تخلیق ہی رہیں ، خدائی کے مقام پر فائز نہ ہو جائیں۔

ڈاکٹر ہمایوں اصغر

Quran aur Science

Dr. Humayun Asghar

Quran Aur Science | قرآن اور سائنس | ڈاکٹر ہمایوں اصغر