قرآن، متعلقات قرآن اور علوم القرآن پر جتنا لٹریچر پایا جاتا ہے اتنا کسی اور کتاب پر نہیں لکھا گیا ہے۔ سب سے پہلے اللہ کے رسول ﷺ نے اپنے فرمودات کے ذریعے سے قرآن کی تعلیمات کو مبرہن کیا۔ آپ ﷺ کے بعدصحابہ کرام کی ایک بڑی تعداد نے قرآن پاک کی توضیح و تشریح کی جن میں ابن عباس بطور خاص قابل ذکر ہے۔ صحابہ کے بعد ہر دور میں قران مجید پر تفسیریں لکھی گئیں۔ اس طرح تفاسیر اور علوم القرآن پر بے شمار کتب منصہ شہود پر آگئیں۔ تفاسیر کا ایک بڑا ذخیرہ موجود ہے اور ہر تفسیر کی منفرد خصوصیات و امتیازات ہوتی ہیں جن سے لوگ استفادہ کرتے ہیں۔ ذخیرہ تفاسیر میں تفسیر طبری، تفسیر کشاف، تفسیر رازی، تفسیر ابن کثیر، روح المعانی، جلالین اور بیضاوی منفرد مقام رکھتے ہیں۔ عصر حاضر میں بھی فہم قرآن کو عام کرنے کے لیے چند اہم تفسیریں لکھی گئی ہیں جن میں تفسیر منار، فی ظلال القرآن، تفہیم القرآن، معارف القرآن، تدبر قرآن، تزکیرالقرآن اور تفسیر ماجدی قابل ذکر ہیں۔ اس مضموں میں صرف تفہیم القرآن کی خصوصیات اور اس کی عصری معنویت پر گفتگو کی جائے گی۔

مولانا سید ابو الاعلیٰ مودودیؒ بیسویں صدی کے جید عالم، مفکر، مصنف اور مجدد گزرے ہیں۔ انہوں نے فکر اسلامی کی تجدید اور احیائے اسلام کے لیے کارہائے نمایاں انجام دیے۔ سید موصوف کو علوم اسلامیہ اور علوم جدیدہ دونوں میں ید طولیٰ حاصل تھا۔ ان کا اگرچہ کوئی خاص میدان نہیں تھا تاہم انہوں نے جس موضوع اور فکر پر بھی خامہ پرسائی کی ایسا لگتا ہے کہ وہ اسی موضوع کے شہسوارہیں۔ انہوں نے قرآن پاک، حدیث، سیرت، فقہ، تاریخ، علم کلام، سیاست، معیشت، معاشرت، تحریک وتنظیم کے علاوہ باطل افکار ونظریات کے رد میں ایسی شاہکار تحریریں چھوڑیں جو طویل عرصے تک زندہ وجاوید رہیں گی۔ مولانا مودودیؒؒ کا ہر کام اپنی جگہ پر ایک اکیڈمی کی حیثیت رکھتا ہے۔ سید موصوف کے بہت سے کارنامے ہیں لیکن تین کارنامے ایسے ہیں جو ہمیشہ یاد رکھے جائیں گے۔

(۱) فکر اسلامی پر بے مثال لٹریچر

(۲) احیائے دین کے لیے جماعت اسلامی کا قیام

(۳) اور عصری اسلوب میں قرآن پاک کا ترجمہ وتفسیر ’’تفہیم القرآن‘‘۔

تفہیم القرآن بیسویں صدی میں تفسیری لٹریچرمیں انتہائی اہم اضافہ ہے۔ اس کے متنوع خصوصیات وامتیازات ہیں جن کی وجہ سے یہ عوام وخواص میں بے حد مقبول ہے۔ یہ حقیقی معنوں میں ایک شاہکا ر (Magnum Opus) تفسیر ہے۔ جو اپنے آغاز سے لیکر اب تک بے شمار اثرات نئی نسل پر مرتب کر چکی ہے نیز یہ سلسلہ ہنوز جاری ہے۔ تفہیم القرآن میں جو جاذبیت اور کشکمش ہے وہ بلا مبالغہ کسی اور اردو تفسیر میں نہیں ہے اگرچہ سبھی تراجم وتفاسیر منفرد خصوصیات کے حامل ہیں لیکن تفہیم القرآن عصر حاضر کے سلگتے ہوئے مسائل کا وحی الٰہی کی روشنی میں جس انداز سے حل پیش کرتا ہے وہ اس کا نمایاں امتیاز ہے۔ مغربی فکر وتہذیب سے متاثر نئی نسل مختلف ذہنی اشکالات اور تہذیب حاضر کے نت نئے مسائل اور الجھنوں میں گھری ہوئی تھی اس کو سید مودودیؒ نے بحسن وخوبی ایڈرس کیا ہے۔ تفہیم القرآن اگرچہ ایک مخصوص طبقے کو ذہن میں رکھ کر لکھی گئی لیکن اس سے ہر خاص وعام مستفید ہو رہا ہے۔ ایک طرف اگر عام تعلیم یافتہ طبقہ کے لیے بیش بہا تحفہ ہے تو وہیں علماء کے لیے بھی یہ نعمت عظمیٰ کی حیثیت رکھتی ہے۔ فہم قرآن کے حصول کے لیے یہ ایک قیمتی سرمایہ ہے۔ برصغیر میں فہم قرآن کا جوذوق وشوق ابھرا۔ اس میں سید مودودیؒ کااہم حصہ ہے۔ بقول مولانا عنایت اللہ سبحانی ’’بہر کیف یہ واقعہ ہے کہ ہندو پاک میں اس وقت مطالعہ قرآن کا جو کچھ تھوڑا بہت ذوق پیدا ہوا ہے وہ زیادہ تر مولانا مودودیؒ کا مرہون منت اور تفہیم القرآن ہی کی برکت ہے۔ ‘‘ بیسویں صدی میں برصغیر پاک وہند میں فہم قرآن کا ذوق ابھرنا ہی تفہیم القرآن کی عظیم الشان فتوح ہے۔ تفہیم القرآن کتابی شکل میں مدون ہونے سے پہلے ہی قسطوں میں ماہنامہ ’’ترجمان القرآن‘‘ میں شائع ہوتا رہا تھا جس کی وجہ سے قارئین کتابی شکل میں آنے سے قبل ہی اس سے آشنا و مانوس تھے۔ تفاسیر میں صرف تفہیم القرآن کو یہ اعزاز حاصل ہے کہ کتابی صورت میں طبع ہونے سے قبل ہی رسالہ ترجمان القرآن میں شائع ہوتا رہا اور صاحب تفہیم القرآن نے اپنے معاصر علماء کو اس بات کی دعوت بھی دی کہ آپ حضرات کو اگر کہیں اس میں کوئی غلطی نظر آئے یا کسی حذف و اضافے کی ضرورت محسوس ہوتو ضرور مطلع فرمائیں۔ خواجہ اقبال احمد ندوی کے مطابق ’’مولانا مودودیؒ نے اصحاب علم اور علمائے کرام سے درخواست کی تھی کہ مسودہ میں اگر کسی مقام پر کوئی غلطی نظر آئے یا کسی مقام پر انہیں محسوس ہو کہ یہاں مزید تشریح کی ضرورت ہے آپ براہ کرم دلائل کے ساتھ مجھے متنبہ فرماتے رہیں تاکہ غلطیوں کی اصلاح اور تشریح رسالہ میں شائع ہوتی رہے۔ جب بھی مسودہ پر دلائل کے ساتھ کوئی اعتراض وارد ہوتا، مولانا خط پڑھتے ہی سارا کام چھوڑ کر، اس کا جائزہ لیتے تھے۔ ‘‘

آغاز تالیف:

مولانا مودودیؒ نے تفہیم القرآن فروری ۱۹۴۲ء میں لکھنا شروع کیا۔ پانچ سال کے عرصے کے بعد یعنی سورہ یوسف کے اختتام تک بے حد تحریکی مصروفیت کی وجہ سے یہ سلسلہ رک گیا۔ پھر ۱۹۴۸ء میں جب جیل جانا پڑا تو بحالت قید ہی اس سلسلے کو پھر سے شروع کیا۔ مولانا مودودی نے ۳۰ سال کی مدت میں ۷؍جون ۱۹۷۲ء میں پایہ تکمیل پہنچائی۔ یہ چھ ضخیم جلدوں اور ۴۱۴۳ صفحات پر مشتمل ہے۔ مولانا نے ۱۹۵۸ء میں تفہیم ہی کے سلسلے میں اپنے ایک رفیق محمد عاصم الحداد کے ساتھ مشرق وسطیٰ کا دورہ بھی کیا جہاں انہوں نے بنفس نفیس ان تمام تاریخی مقامات اور آثار کو دیکھا جن کا تذکرہ قرآن مجید میں جگہ جگہ وارد ہے۔ مشرق وسطیٰ کا یہ پورا سفر نامہ بعد میں عاصم الحداد نے بڑے دلکش اسلوب میں قلم بند کر کے سفرنامہ ارض القرآن کے نام کے تحت شائع کیا۔

تفہیم القرآن کی غرض وغایت:

سید مودودیؒ کے ذہن میں قرآن مجید کے ترجمہ وتفسیر لکھنے کا مقصد ومدعا واضح تھا وہ قرآن مجید کا ایک نیا ترجمہ وتفسیر ایک اضافے کے طور پر اور محض خیر وبرکت کے حصول کے لیے وقت کا زیاں سمجھتے تھے۔ انہوں نے جس طبقے کو ذہن میں رکھ کر تفسیر لکھی اس میں انہیں سو فیصدی کامیابی ملی۔ مولانا کے پیش نظر جو طبقہ تھا وہ عام تعلیم یافتہ طبقہ تھا جو عربی زبان سے بالکل نابلد ہے۔ انہوں نے تفسیر لکھنے کا مقصد تفہیم القرآن کے دیباچے کے پہلے ہی صفحے پر بیان کیا ہے چنانچہ لکھتے ہیں: ’’میں ایک مدت سے محسوس کر رہا تھا کہ ہمارے عام تعلیم یافتہ لوگوں میں روح قرآن تک پہنچنے اور اس کتاب پاک کے حقیقی مدعا سے روشناس ہونے کی جو طلب پیدا ہو گئی ہے اور روز بروز بڑھ رہی ہے وہ مترجمین ومفسرین کی قابل قدر مساعی کے باوجود ہنوز تشنہ ہے اس کے ساتھ یہ احساس بھی اپنے اندر پا رہا تھا کہ اس تشنگی کو بجھانے کے لیے کچھ نہ کچھ خدمت میں بھی کر سکتا ہوں۔ انہی دونون احساسات نے مجھے اس کوشش پر مجبور کیا جس کے ثمرات ہدیہ ناظرین کر رہاہوں ـ‘‘

تفہیم القرآن کی چند نمایاں خصوصیات و امتیازیات

عمدہ اسلوب :

تفہیم القرآن کا اسلوب نہایت عمدہ ہے، یہ اردو نثر کا ایک عظیم شہ پارہ ہے (Masterly Prose style) ہے۔ چونکہ اس کے مخاطب عام تعلیم یافتہ طبقہ ہے اس لیے سید مودودی نے زبان نہایت ہی آسان اور عام فہم استعمال کی ہے اور انداز بیان بہت ہی دلکش اور دلنشین ہے۔ زبان و انداز بیان کے تعلق سے ایک قاری کہیں بھی دقت مــحسوس نہیں کرتا اور نہ ہی کہیں اکتاہٹ کے شکار ہوتا۔ خوبصورت انداز بیان اور سلیس زبان میں ہی تفہیم القرآن کی مقبولیت کا راز پنہاں ہے۔ ینگس ٹاون یونیورسٹی امریکہ کے پروفیسر مستنصر میر اس کی زبان کے بارے میـں لکھتے ہیں :

"Tafhim has been called the first bestselling Urdu Quran commentary ,and the main reason for its popularity is the limped beauty of its style "(American journal of social sciences ,vol:2,1985)

زبان و بیان کی خوبصورتی ہی کسی نثر کو شہکار بناتی ہے یہ پہلو تفہیم القرآن میں بدرجہ اتم موجود ہے۔ اس میں علمی و فکری مسائل کی توضیح کے ساتھ ساتھاس مین سادگی اور روانی ہے گویا یہ فصاحت و بلاغت کا اعلیٰ نمونہ ہے۔ تفہیم القرآن حسن بیان کے علاوہ لطافت ونفاست کی رعناعیوں سے لیس ہے۔ اسد میں اجمال و تفصیل کا بھی پہلو ہے، جہاں اجمال کی ضرورت پڑتی ہے وہیں اجمال ہی سے مصنف نے کام لیا ہے اور جہاں مسئلہ وضاحت طلب ہو وہاں تفصیل بخشنے میں کوئی کوتاہی نہیں کی۔

اسلام مکمل ضابطہ حیات ہے :

اس بات میں کوئی دو رائے نہیں کہ اسلام انسانی زندگی کے لیے مکمل ضابطہ حیات ہے اور قرآن پاک مکمل دستور العمل ہے۔ یہ ہرزمانے کے لیے کامیابی اور فلاح وبہبود کا ضامن ہے جو دنیائے انسانیت کے لیے ہمیشہ قابل تقلید رہے گا۔ سید مودودیؒ نے تفہیم القرآن میں اس بحث کو مضبوط استدلال سے واضح کیا اور انسانی زندگی کے ہر شعبے کے لیے ایک خاص اسلوب اور نہج میں ضابطہ حیات کے طور پر پیش کیاہے۔ برصغیر میں اسلام ایک مکمل نظام زندگی کے طور پیش کرنے کا سہرا سید مودودیؒ کے سر ہی بندھتا ہے۔ انہوں نے تفہیم القرآن میں جگہ جگہ اس کی توضیح وتشریح گہرائی اور انتہائی علمی وفکری قوت کے ساتھ مدلل انداز میں کی ہے۔ مثلاً سورہ مائدہ کی ایک آیت الیوم اکملت لکم دینکم کی تشریح کرتے ہوئے لکھتے ہیں: دین کو مکمل کر دینے سے مراد اس کو ایک مکمل نظام فکر وعمل اور ایک ایسا مکمل نظام تہذیب وتمدن بنا دینا ہے جس میں زندگی کے جملہ مسائل کا جواب اصولاً یا تفصیلاً موجود ہو اور ہدایت ورہنمائی حاصل کرنے کے لیے کسی حال میں اس سے باہر جانے کی ضرورت پیش نہ آئے۔ نعمت تمام کر دینے سے مراد نعمت ہدایت کی تکمیل کر دینا ہے۔ ‘‘ سید مودودیؒ نے تفہیم القرآن میں جگہ جگہ اس فکر کا تعارف کرایا کہ اللہ تعالیٰ کا نازل کردہ کلام انسان کو ہر لمحہ رہنمائی کا کام کرتا ہے۔ سید مودودیؒ کو اس بات پر یقین محکم تھا کہ اسلام روحانی، معاشرتی، معاشی، سیاسی، خاندانی، اخلاقی مسائل کا ایسا مکمل حل پیش کرتا ہے جس کے بعد کسی اور نظریہ یا مذہب کی طرف رجوع کرنے کی ضرورت نہیں پڑتی ہے یہ عقیدہ سید مودودیؒ نے تفہیم القرآن کے ذریعے سے عام کیاہے۔

اسلام کی عصری معنویت:

اسلام دور حاضر کے مسائل کو حل کرنے کی بھرپور قوت اور صلاحیت رکھتا ہے۔ عالمگیریت کے اس دور میں بھی اسلام اپنی نمائندگی خوب کرتا ہے سید مودودیؒ نے اس پہلو کو بھی تفہیم القرآن اور دیگر تصانیف میں نمایاں کیا ہے۔ انہوں نے اسلام کو دور حاضر سے ایسی ہم آہنگی پیدا کی کہ اب ہر خاص وعام اس بات پر متفق ہے کہ اسلام عصر حاضر کا دین ہے۔ اور تفہیم القرآن میں اکثر مقامات پر انہوں نے اس بات کی خوب وضاحت کی کہ اسلام کیسے عصر حاضر سے مطابقت(Relevancy) رکھتا ہے اور اس میں سید مودودیؒ پوری طرح کامیاب بھی رہے۔ مغربی فکر وتہذیب سے مرعوبیت کے شکار نئی نسل اسلام کی ضرورت محسوس نہیں کرتے تھے وہ اسلام کو فرسودہ اور ازمنہ وسطیٰ کا مذہب سمجھتے تھے اور الحاد کو اپنا قبلہ منتخب کر چکے تھے اس تعلق سے دار العلوم دیوبند کے ایک مشہور عالم دین مولانا عامر عثمانیؒ لکھتے ہیں کہ تفہیم القرآن کا گراں قدر امتیاز یہ ہے کہ وہ موجودہ مغرب زدہ اذہان کو قرآن کریم اور اسلام کو سمجھانے اور قریب لانے میں نہایت دلکش انداز وپیرایہ کا شاہکار ہے۔ ہر جگہ تفہیم اور سید مودودیؒ کے مضامین نے باغی سے باغی مسلم نوجوان کو حیرت انگیز حد تک یکسر بدل کر رکھ دیا ہے۔ الحاد وبغاوت کی قعرِ مذلت سے نکال کر سراپا دلدادہ اسلام بنا دیا ہے‘‘۔

یہ بات بھی واضح رہے کہ جدیدیت اور مغربی فکر وتہذیب کے پیدا شدہ مسائل سے نپٹنے کے لیے سید مودودیؒ کے معاصر مفسرین ذہنی وعملی طور سے تیار نہیں تھے۔ انہوں نے چند مسائل کا حل اگرچہ پیش بھی کیا لیکن وہ زیادہ مدلل نہیں ہوتے تھے۔ پروفیسر مستنصر میر لکھتے ہیں:

"Mawdudi is keenly aware of the importance of issues and problems of modernity which even today many Muslim Quran scholars refuse to recognize as proper grist for their mills "

سید مودودیؒ پوری طرح سے جدیدیت کے پیدا شدہ مسائل اور قضیوں سے باخبر تھے اور آج تک قرآن اسکالر یا مفسرین قرآن کو اعلیٰ فائدے کی نعمت نہیں تصور کرتے ہیں۔

تفہیم القرآن عصری علوم کا ایک انسائیکلوپیڈیا:

تفہیم القرآن قدیم وجدید علوم کا ایک خزینہ ہے۔ یہ محض علوم اسلامیہ کا ہی نہیں بلکہ جدید علوم بھی ایک ضخیم انسائیکلو پیڈیا ہے۔ اس میں تمام ضروری علوم کی سیر حاصل بحثیں ملتی ہیں۔ سید مودودیؒ بیسویں صدی کے ایک جید عالم تھے جنہیں قدیم وجدید علوم پر یدطولیٰ حاصل تھا۔ انہوں نے علوم کے تمام موتی تفہیم القرآن میں ڈال دیے ہے۔ تفہیم القرآن میں جہاں علم کلام کو ایک نئی سمت بخشی گئی وہیں فلسفہ کو اسلامی رنگ میں پیش کیا گیا۔ اس میں اگر سائنس کے مختلف شاخوں پر وافر مقدار میں مواد موجود ہے وہیں سماجیات پر بھی اچھا خاصا ذخیرہ قارئین کے لیے دستیاب ہے۔ اس میں اگر قدیم افکار پر نہایت اہم گفتگو کی گئی وہیں عصر حاضر کے افکار ونظریات کے رد اور تحلیلی جائزے پر بھی انتہائی قیمتی بحثیں ملتی ہیں اور کمال کی بات یہ ہے کہ مولانا نے نہ صرف سرمایہ دارانہ نظام، مادہ پرستی، اشتراکیت اور مغربی فکر وفلسفے کے تار بکھیر دیے بلکہ مارکس، ہیگل، ڈارون اور فرائیڈ کو آڑے ہاتھوں لیا جنہوں نے انسانی زندگی پر تباہ کن اثرات ڈال دیے تھے۔ تفہیم القرآن میں جہاں تہذیب وسیاست کے متعلق ایک ہمہ گیر بحث کو آگے بڑھایا گیا وہیں اقتصادیات جیسے اہم موضوع پر رہنمائی کا وافر سامان بھی موجود ہے۔ مولانا نعیم صدیقی نے بالکل درست فرمایا کہ ’’تفہیم القرآن میں اسلامی نظام حیات کے ہر شعبے پر ٹھوس مواد یکجا کر دیا گیا ہے۔ سیاست، معیشت، تاریخ اخلاقیات، نفسیات، علوم الاقوام، قصص الانبیاء اور خود سیرۃ النبیؐ پر اس میں اتنا کچھ مواد سمیٹ کر رکھ دیا گیا ہے کہ اب اسے نظر انداز کرنا کسی کے بس میں نہیں ہے۔ ‘‘

تقابل ادیان کا مطالبہ

تفہیم القرآن میں سید مودودیؒ نے عیسائیت، یہودیت اور دیگر اقوام وملل کی تفصیل کے ساتھ روشنی ڈالی اور قرآن کی تعلیمات کے ساتھ تقابلی مطالبہ پیش کیا ہے۔ مولانا نے تورات، زبور اور انجیل کی تحریفات کا تذکرہ تفصیل کے ساتھ پیش کیا نیز عیسائی پادریوں کے ذاتی مفادات اور ان کی کارستانیوں کو بھی عیاں کیا ہے۔ تفہیم القرآن میں مستشرقین کی طرف سے اٹھائے گئے بے جا اعتراضات کے بھی مدلل جوابات ملتے ہیں۔ انہوں نے دوسرے مذاہب کا بے لاگ اور بے باق تنقیدی جائزہ پیش کر کے ان کی جملہ کمزوریوں کو عیاں کیا ہے۔ بنا بریں یہ بھی ثابت کیا کہ کس طرح سے عیسائیت اور یہودیت نے اپنی اہمیت اور معنویت کھو دی ہے۔ یہودیت وعیسائیت کے بنیادی عقائد میں بگاڑ، تورات انجیل اور زبور کی مجرمانہ غلطیاں، عقیدۂ تثلیث پر محاکمہ، بنی اسرائیل کا انبیاء کے ساتھ روگردانی اور سابق اقوام کی نافرمانیاں، جیسے موضوعات پر تفہیم القرآن کے اوراق بھرے پڑے ہیں۔ سید مودودیؒ نے تورات (عہد نامہ قدیم اور عہد نامہ جدید) اور عیسائی و یہودی مصنفین کے حوالوں سے عیسائیت اور یہودیت کے فسادات اور تضادات مبرہن کئے ہیں۔

مجتبی فاروق

Tafheem ul Quran Maulana Maududi

تفہیم القرآن ۔ 6 جلدیں | مولانا مودودی