اردو طنز و مزاح کا یوسفِ لاثانی | مشتاق احمد یوسفی | Mushtaq Ahmed Yusufi

اردو طنز و مزاح کا یوسفِ لاثانی | مشتاق احمد یوسفی
مصنفہ: ڈاکٹر بی بی رضا خاتون
قیمت 700 روپے

-----------------------------------------------
اب تک ہم نے حُسنِ یوسف کی مدح میں یوسفِ ثانی تو سنا تھا لیکن یوسفِ لاثانی کبھی سنانہیں تھا۔ شاید مشتاق احمد یوسفی کے مزاح کی تعریف کے لیے ان کو اُردو مزاح کا یوسف لا ثانی کہنا ہی زیادہ مناسب تھا۔ یوسفی کو خود بھی ا س بات کا علم نہ ہو گا کہ ان کے بے شمار مدّاحوں میں بی بی رضا خاتون نامی ایک ایسی ریسرچ اسکالر موجود ہے جو ان کی ہر جنبشِ قلم کی ادا شناس ہے۔ حیرت ہوتی ہے کہ ایک کم عمر لڑکی اپنے پسندیدہ مزاح نگار کے فن پر ایسی گہری نگاہ رکھتی ہے۔ اس کتاب کو پڑھ کر یوسفی کے ہر چاہنے والے کو خوشی ہو گی لیکن میرا خیال ہے کہ سب سے زیادہ خوشی خود یوسفی کو ہوگی کہ ان کی تحریر کی صحیح قدر داں حیدرآباد دکن میں بھی مقیم ہے جہاں وہ آج تک آئے نہیں ہیں۔ اس دستاویز کے لیے بی بی رضا خاتون کو دلی مبارکباد۔
مجتبیٰ حسین
گلبرگہ (ہندوستان)
----------------------------------------------------------------------------
مصنفہ کا تعارف:

ڈاکٹر بی بی رضاخاتون شعبہ اُردو مولانا آزاد نیشنل اُردو یونیورسٹی حیدرآباد میں بحیثیت اسسٹنٹ پروفیسر تدریسی خدمات انجام دے رہی ہیں۔ ان کی پیدائش 10 جولائی 1979ء کو ہندوستان کے تاریخی شہر گلبرگہ(دکن) میں ہوئی۔ ان کے والد کا نام محمد مقبول شریف اور والدہ کا نام نورجہاں بیگم ہے۔ ان کی ابتدائی تعلیم گلبرگہ میں ہوئی۔ گلبرگہ یونیورسٹی گلبرگہ سے ایم اے (اُردو ) اور پی ایچ ڈی کی ڈگری حاصل کی۔ اس سے قبل ’’سردار جعفری : کل اور آج ‘‘ کے عنوان سے ایک کتاب مرتب کر چکی ہیں۔ ان کے پچیس سے زائد تحقیقی و تنقیدی مضامین مؤقر رسائل و جرائد میں شائع ہوچکے ہیں۔ انہوں نے تیس (30 ) سے زائد قومی اور بین الاقوامی سمیناروں میں مقالات پیش کیے ہیں۔ ادب میں شاعری اور غیر افسانوی ادب سے انہیں خصوصی دلچسپی ہے۔ ان کی تصنیف ’’اُردو طنزومزاح کا یوسف لاثانی: مشتاق احمد یوسفی ‘‘2016ء میں منظر عام پر آئی۔ اس کتاب کو کرناٹک اُردو اکیڈمی بنگلور اور اترپردیش اُردو اکیڈمی لکھنؤ نے انعامات سے نوازا۔ بی بی رضاخاتون کو ادب کے مطالعے اور درس و تدریس سے شغف ہے۔ حال ہی میں ایسوسی ایشن آف مسلم پروفیشنلز (ممبئی ) نے انہیں نیشنل ایوارڈ فار ایکسی لینس ان ایجوکیشن 2018ء کے اعزاز سے نوازا ہے۔